काठमाडौं, फागुन १८ — चार कम्युनिष्ट पार्टीहरूद्धारा निर्मित केन्द्रीय संयुक्त संघर्ष समितिले सोमबार एक प्रेस वक्तव्य जारी गर्दै नेपाली समाजमा देखिएका समस्या समाधानका लागि चुनाव बहिष्कार गरी समाजवादी व्यवस्था निर्माणतर्फ अग्रसर हुन आह्वान गरेका छन् । संयुक्त वक्तव्यमा क्रान्तिकारी कम्युनिष्ट पार्टी नेपाल, नेपाल कम्युनिष्ट पार्टी (बहुमत), वैज्ञानिक समाजवादी कम्युनिष्ट पार्टी र नेपाल कम्युनिष्ट पार्टीले वर्तमान संसदीय व्यवस्थाबाट जनताका आधारभूत समस्या समाधान हुन नसकेको निष्कर्ष निकालेका छन् ।
वक्तव्यमा मुलुकको राष्ट्रियता, जनतन्त्र र जनजीविकाका सवालहरू गम्भीर बन्दै गएको उल्लेख गर्दै समाजवाद नै यसको विकल्प भएको दाबी गरिएको छ । चार दलले वर्तमान राजनीतिक व्यवस्थाले देशलाई संकटतर्फ धकेलेको आरोप लगाउँदै जनताको अधिकार सुनिश्चित गर्न नयाँ वैकल्पिक व्यवस्था आवश्यक रहेको बताएका छन् । उनीहरूले राजनीतिक दलहरूबीच देखिएको विभाजन र अविश्वासले जनआकांक्षा पूरा हुन नसकेको उल्लेख गर्दै साझा आन्दोलन र सहकार्यको खाँचो औंल्याएका छन् । साथै, कार्यकर्ता र जनतालाई एकताबद्ध भई संघर्षमा उत्रिन अपिल गरिएको छ ।