चितवन, फागुन २१ । चितवन जिल्लाको भरतपुर महानगरपालिका–१० स्थित नारायणी नमूना माध्यमिक विद्यालयमा रहेको मतदान केन्द्रमा मतदान भइरहेको समयमा नेकपा (बहुमत) निकट कार्यकर्ताहरूले विरोध प्रदर्शन गरेका छन् । कार्यकर्ताहरूले “यो निर्वाचन धोका हो”, “स्वाधीन संयुक्त सरकार गठन गर” र “नेपाल कम्युनिष्ट पार्टी (बहुमत) जिन्दावाद” लेखिएका पोस्टर प्रदर्शन गर्दै चुनावप्रति असहमति जनाएका थिए । प्रदर्शनका क्रममा प्रहरीले नेकपा (बहुमत) चितवनका जिल्ला सचिव सुमन श्रेष्ठ तथा चितवनका विद्यार्थी नेतालाई बल प्रयोग गरी नियन्त्रणमा लिएको बताइएको छ ।
उक्त पार्टीले लामो समयदेखि वर्तमान निर्वाचन प्रक्रिया खारेज गर्नुपर्ने माग गर्दै विभिन्न गतिविधि गर्दै आएको छ । पार्टीको भनाइअनुसार यो चुनाव देशको स्वाधीनता र सार्वभौमसत्ताको विपक्षमा रहेको भन्दै सर्वपक्षीय राष्ट्रिय सभामार्फत स्वाधीन संयुक्त सरकार गठन गर्नुपर्ने र सोही सरकारले जनसंविधान निर्माण गर्नुपर्ने माग अघि सारिएको छ । यसै राजनीतिक नारासहित कार्यक्रम गर्दै आएका पार्टीका करिब तीन दर्जन नेता–कार्यकर्तालाई प्रहरीले पक्राउ गरी हिरासतमा राखेको नेकपा (बहुमत) केन्द्रीय कार्यालयले जनाएको छ ।