काठमाडौँ । अखिल नेपाल महिला संगठन केन्द्रीय समितिले ११६औँ अन्तर्राष्ट्रिय श्रमिक महिला दिवसको अवसरमा सम्पूर्ण श्रमजीवी तथा उत्पीडित महिलालाई शुभकामना व्यक्त गरेको छ । २४ फागुनमा संगठनकी अध्यक्ष अञ्जना तामाङद्वारा जारी शुभकामना सन्देशमा समान अधिकार र स्वतन्त्रताको लागि महिलाले लामो समयदेखि संघर्ष गर्दै आएको उल्लेख गरिएको छ । सन्देशमा विश्वभर महिलाहरू सामाजिक, आर्थिक, राजनीतिक र सांस्कृतिक रूपमा अझै पनि विभिन्न प्रकारका विभेद, शोषण र उत्पीडनको सामना गरिरहेको बताइएको छ ।
विज्ञप्तिमा पूँजीवादी र पितृसत्तात्मक संरचनाका कारण महिलामाथि श्रम शोषण, असमान ज्याला, घरेलु हिंसा, यौन दुर्व्यवहार तथा विभिन्न प्रकारका विभेद कायम रहेको उल्लेख गरिएको छ । यस्ता समस्याको अन्त्यका लागि महिलाहरू संगठित भएर अधिकार प्राप्तिको आन्दोलनमा अघि बढ्नुपर्ने संगठनले जनाएको छ । साथै, नेपाली समाजमा विद्यमान वर्गीय, जातीय तथा लैङ्गिक विभेद अन्त्य गर्न महिलाको महत्वपूर्ण भूमिका रहेको भन्दै समानता, स्वतन्त्रता र अधिकार सुनिश्चित गर्न संघर्षलाई अझ सशक्त बनाउनुपर्ने आवश्यकता औँल्याइएको छ ।
अखिल नेपाल महिला संगठनले महिलाको मुक्ति र समान अधिकार सुनिश्चित गर्न सामाजिक न्यायमा आधारित व्यवस्था स्थापनाको दिशामा आन्दोलनलाई निरन्तर अगाडि बढाउने प्रतिबद्धता समेत व्यक्त गरेको छ ।