काठमाडौँ, चैत ५ । विभिन्न विद्यार्थी संगठनहरूले मध्यपूर्वमा बढ्दो द्वन्द्व, पेट्रोलियम पदार्थको मूल्यवृद्धि, नेपाली श्रमिकहरूको सुरक्षा तथा देशभित्र बढ्दो महिला हिंसाका घटनाप्रति गम्भीर चिन्ता व्यक्त गरेका छन् । बुधबार जारी संयुक्त प्रेस वक्तव्यमा उनीहरूले इरानमाथि भएको अमेरिकी–इजरायली आक्रमणको कडा विरोध गर्दै त्यस्ता गतिविधिले विश्व शान्तिमा गम्भीर असर पर्ने बताएका छन् । वक्तव्यमा हजारौँ मानिसको ज्यान गएको घटनाप्रति दुःख व्यक्त गर्दै युद्ध अन्त्य गरी शान्ति स्थापना गर्न विश्व समुदायसँग अपिल गरिएको छ । विद्यार्थी संगठनहरूले मध्यपूर्वमा भइरहेको द्वन्द्वका कारण त्यहाँ कार्यरत नेपाली श्रमिकहरूको सुरक्षामा खतरा बढेको उल्लेख गरेका छन् । उनीहरूले नेपाल सरकारलाई कूटनीतिक पहल तीव्र पार्दै असुरक्षित क्षेत्रबाट नेपाली नागरिकलाई सुरक्षित रूपमा स्वदेश फर्काउने व्यवस्था मिलाउन माग गरेका छन् ।
त्यस्तै, पछिल्लो समय पेट्रोलियम पदार्थको मूल्य अस्वाभाविक रूपमा बढाइएकोप्रति पनि संगठनहरूले आपत्ति जनाएका छन् । मूल्यवृद्धिका कारण सर्वसाधारणको जनजीवन कष्टकर बन्ने भन्दै हालको मूल्य समायोजन खारेज गर्न र कर घटाउन माग गरिएको छ । साथै, बजारमा कृत्रिम अभाव सिर्जना गर्ने तथा कालोबजारी गर्नेहरूमाथि कडा कारबाही गर्न पनि आग्रह गरिएको छ । यसैबीच, देशभित्र महिला हिंसाका घटनाहरू बढ्दै गएको भन्दै संगठनहरूले गम्भीर चिन्ता व्यक्त गरेका छन् । सुर्खेतमा इन्जिनियर विकाशी बलात्कारपछि हत्या गरिएको घटनालाई उदाहरण दिँदै दोषीलाई कडा कारबाही गर्न र यस्ता घटनाको निष्पक्ष छानबिन गर्न माग गरिएको छ ।