काठमाडौं, बैशाख ५ । नेपाल कम्युनिस्ट पार्टी (बहुमत) ले आफ्ना सल्लाहकार समितिका सदस्य लीलाधर गौतमको निधनप्रति गहिरो दुःख व्यक्त गरेको छ । पार्टीद्वारा जारी शोक वक्तव्य अनुसार गौतमको ७१ वर्षको उमेरमा बैशाख ५ गते सुर्खेतस्थित कर्णाली प्रदेश अस्पतालमा उपचारका क्रममा निधन भएको हो । उनी विगत लामो समयदेखि अस्वस्थ रहेका थिए । विरेन्द्रनगर नगरपालिका–४ निवासी गौतम पञ्चायतकालीन संघर्षका सक्रिय सहभागी थिए । २०१८ सालमा पञ्चायती व्यवस्थाविरुद्धको आन्दोलनमा जेल जीवन बिताएका उनले पछि २०४८ सालमा नेकपा एमालेबाट अलग हुँदै नेकपा एकताकेन्द्रमा आवद्ध भएका थिए । जनयुद्धको अवधिमा समेत सक्रिय भूमिका खेलेका गौतमलाई पार्टीले स्पष्ट दृष्टिकोण भएका सम्मानित नेताका रूपमा स्मरण गरेको छ । पार्टीका अनुसार १० वर्षे जनयुद्धका क्रममा उनका परिवारले समेत प्रत्यक्ष रूपमा योगदान पुर्‍याएको थियो, जसलाई नेपाली क्रान्तिकारी आन्दोलनले सधैं सम्झिरहने उल्लेख गरिएको छ ।