काठमाडौं, वैशाख ७ । गृहमन्त्री सुदङ गुरुङको कथित शंकास्पद आर्थिक सम्बन्धको विरोधमा आज दिउँसो राजधानीको माइतीघर मण्डलामा प्रदर्शन गरिएको छ । नेकपा (बहुमत) निकट अखिल (क्रान्तिकारी) का बागमती प्रदेश संयोजक हस्त बिकका अनुसार गृहमन्त्रीसँग ८९ तोला सुन, हदबन्दीभन्दा बढी विभिन्न स्थानमा जमिन तथा बिचौलिया दिपक भट्टसँग आर्थिक सम्बन्ध रहेको आरोप सार्वजनिक भएपछि त्यसको स्रोतबारे निष्पक्ष छानबिनको माग गर्दै प्रदर्शन गरिएको हो । उनले उपत्यकाभित्रका सिटिइभिटी विशेष प्रदेश, बागमती प्रदेश र त्रिभुवन विश्वविद्यालय विशेष प्रदेश समितिको संयुक्त पहलमा कार्यक्रम आयोजना गरिएको जानकारी दिए ।
प्रदर्शनका क्रममा सहभागीहरूले “गृहमन्त्री सुदङ गुरुङ राजीनामा दे”, “शंकास्पद सम्पत्तिको छानबिन गर”, “मन्त्रीहरूको सम्पत्ति स्रोत सार्वजनिक गर” जस्ता नारा लगाएका थिए । साथै, “कानून पढेर सकिएन, मन्त्री ज्यू?” र “खोइ नैतिकता?” जस्ता प्लेकार्डसमेत प्रदर्शन गरिएको थियो । प्रदर्शनकारीहरूले सम्बन्धित निकायमार्फत निष्पक्ष छानबिन गरी यथार्थ सार्वजनिक गर्न सरकारसँग माग गरेका छन् ।