वासिङ्टन डीसी । अमेरिकी संघीय अनुसन्धान ब्यूरो (एफबीआई) का पूर्व निर्देशक जेम्स कोमी अमेरिकी राष्ट्रपति डोनाल्ड ट्रम्पविरुद्ध ज्यान मार्ने धम्की दिएको आरोपमा अदालतमा उपस्थित भएका छन् । सामाजिक सञ्जाल इन्स्टाग्राममा उनले पोस्ट गरेको एक तस्बिरका कारण उनी विवादमा तानिएका हुन् । उक्त तस्बिरमा समुद्री किनारका शंख र ढुङ्गाहरूलाई ‘८६ ४७’ भन्ने ढाँचामा सजाइएको देखिन्छ । अङ्ग्रेजी स्ल्याङमा ‘८६’ को अर्थ कुनै कुरा हटाउनु वा नष्ट गर्नु भन्ने लाग्ने हुँदा, ‘४७’ ले अमेरिकाको ४७औँ राष्ट्रपति डोनाल्ड ट्रम्पलाई जनाउने भन्दै अभियोक्ताहरूले यसलाई हिंसात्मक संकेतको रूपमा व्याख्या गरेका छन् ।
यसै आरोपमा कोमी बुधबार भर्जिनियास्थित अदालतमा उपस्थित भएका थिए । उनले भने आफू निर्दोष रहेको दाबी गर्दै ती अंकहरूको अर्थ आफूलाई थाहा नभएको बताएका छन् । साथै उनले यो मुद्दा राजनीतिक प्रतिशोधको परिणाम भएको आरोप पनि लगाएका छन् । कोमीका वकिल प्याट्रिक फिट्जगेराल्डले आफ्नो मुवक्किललाई केवल ट्रम्पको आलोचना गरेको कारण लक्षित गरिएको भन्दै मुद्दा खारेज गर्न माग गरेका छन् । सुनुवाइका क्रममा न्यायाधीश विलियम फिट्ज्पाट्रिकले कोमीलाई बिना कुनै सर्त रिहा गर्न अनुमति दिएका छन् । यस घटनाले अभिव्यक्ति स्वतन्त्रता र राजनीतिक तनावबीचको सन्तुलनबारे बहसलाई पुनः सतहमा ल्याएको छ ।