काठमाडौं, वैशाख २५ । केन्द्रीय संयुक्त संघर्ष समितिले सरकारद्वारा सुकुम्बासीमाथि गरिएको दमन, राष्ट्रिय स्वाधीनतासम्बन्धी विषय तथा महँगी नियन्त्रणमा असफल भएको भन्दै कडा विरोध जनाएको छ । समितिका संयोजक धर्मेन्द्र बास्तोला ‘कञ्चन’ ले प्रेस वक्तव्य जारी गर्दै सरकारका विभिन्न गतिविधिप्रति असन्तुष्टि व्यक्त गरेको हो । वक्तव्यमा काठमाडौंका विभिन्न स्थानमा सुकुम्बासीमाथि गरिएको बल प्रयोग, उचित वैकल्पिक बसोबासको व्यवस्था नगरी गरिएको उठीबास तथा राज्य आतंकको शैलीको दमनको निन्दा गरिएको छ । समितिले सुकुम्बासीलाई तत्काल उचित बसोबासको व्यवस्था गर्न, बालबालिकाको पढाइ सुनिश्चित गर्न तथा क्षतिपूर्तिको व्यवस्था गर्न सरकारसँग माग गरेको छ । त्यसैगरी समितिले एमसीसी सम्झौता कार्यान्वयन प्रक्रिया तत्काल रोक्न र खारेज गर्न माग गरेको छ । राष्ट्रिय स्वाधीनतामाथि खतरा बढेको दाबी गर्दै सरकारले विदेशी शक्तिको प्रभावमा काम गरेको आरोप पनि वक्तव्यमा लगाइएको छ ।
समितिले लिपुलेक पास हुँदै भारतले मानसरोवर यात्रा सञ्चालन गर्न थालेको विषयलाई नेपालको सार्वभौमिकतामाथिको आघात भएको जनाएको छ । भारत र चीनबीचको सहमतिमा भएको उक्त कदमप्रति नेपाली जनतामा असन्तुष्टि रहेको उल्लेख गर्दै सरकारले कूटनीतिक पहल गर्नुपर्ने माग गरिएको छ । वक्तव्यमा बढ्दो महँगी नियन्त्रण गर्न प्रभावकारी रणनीति ल्याउन सरकारलाई आग्रह गरिएको छ । साथै विद्यार्थी संगठन र ट्रेड युनियनमाथि लगाइएको प्रतिबन्ध संविधानको मौलिक हकविपरीत भएको भन्दै तत्काल फिर्ता लिन चेतावनी दिइएको छ । समितिले आगामी वैशाख ३० गते राजधानीसहित देशभर विरोध प्रदर्शन आयोजना गरिने जानकारी दिँदै कार्यक्रममा सहभागी हुन सर्वसाधारणलाई अपिल गरेको छ ।