दाङ, असार १३ । नेकपा (बहुमत) दाङ जिल्लाको दोस्रो जिल्ला भेला शनिबार सम्पन्न भएको छ । भेलाले सजकको नेतृत्वमा १३ सदस्यीय नयाँ जिल्ला समिति चयन गरेको छ । भेलाका प्रमुख अतिथि, पार्टीका सचिवालय सदस्य तथा ५ नम्बर ब्युरो इन्चार्ज तिलकले भेलाको सफलताको शुभकामना व्यक्त गर्दै वर्गीय मुक्तिको आन्दोलनलाई सशक्त बनाउन सबै क्रान्तिकारी शक्तिहरूबीच एकता आवश्यक रहेको बताए । उनले वर्तमान संसदीय पुँजीवादी व्यवस्थामा निम्नवर्गीय नागरिकको अधिकार र हितको संरक्षण सम्भव नभएको दाबी गर्दै वैज्ञानिक समाजवाद स्थापना गर्न संघर्षलाई तीव्र बनाउनुपर्ने धारणा राखे । उनले व्यवस्था परिवर्तनबिना सरकार वा दल फेरिए पनि जनताको पक्षमा अपेक्षित काम हुन नसक्ने जिकिर गरे ।
तिलकले मिटरब्याजी तथा लघुवित्त संस्थाबाट सर्वसाधारण माथि भइरहेको आर्थिक शोषणको आरोप लगाउँदै यस्ता गतिविधि विरुद्ध पार्टीले विगतमा दाङमा कारबाही गरेको स्मरण गराए । उनले भविष्यमा पनि जनतालाई दुःख दिने शोषक विरुद्ध आवश्यक कारबाही गरिने चेतावनी दिए । भेलामा पार्टीका केन्द्रीय सदस्य तथा ५ नम्बर ब्युरो कार्यालय सचिव अमर खड्का, अखिल (क्रान्तिकारी)का केन्द्रीय सचिव तथा लुम्बिनी इन्चार्ज प्रेम प्रशान्त बोहरा, रुकुम पश्चिम जिल्ला सचिव सोम्पाल कामी , कम्युनिस्ट युवा संगठन नेपालका जिल्ला इन्चार्ज वर्षात लगायतले शुभकामना मन्तव्य राखेका थिए । जिल्ला सेक्रेटरी सजकको अध्यक्षतामा सम्पन्न भएको भेलाको सञ्चालन नरेन्द्र बिकले गरेका थिए ।