पोखरा, असार २९ । नेपाल कम्युनिस्ट पार्टी (बहुमत) कास्की जिल्लाको दोस्रो जिल्ला भेला सम्पन्न भएको छ । भेलाले सबिनको नेतृत्वमा २१ सदस्यीय जिल्ला समिति सर्वसम्मत रूपमा चयन गरेको जनाएको छ । भेलालाई सम्बोधन गर्दै पार्टीका प्रवक्ता दिपकले वर्तमान राजनीतिक परिस्थितिबारे विस्तृत विश्लेषण प्रस्तुत गर्दै मुलुकको प्रमुख आवश्यकता वैज्ञानिक समाजवादी क्रान्ति रहेको धारणा राखे । उनले उक्त लक्ष्य हासिल गर्न पार्टीका सम्पूर्ण नेता तथा कार्यकर्ताले आ–आफ्नो जिम्मेवारी प्रभावकारी रूपमा निर्वाह गर्नुपर्नेमा जोड दिँदै वैज्ञानिक समाजवादी क्रान्तिको अभियानलाई सफल बनाउन सक्रिय भूमिका खेल्न आह्वान गरे ।
कार्यक्रममा पार्टीको ४ नम्बर ब्युरोका इन्चार्ज सुजनले वर्तमान सरकार फासिवादतर्फ उन्मुख भइरहेको आरोप लगाउँदै त्यसको सशक्त प्रतिवाद गरिने बताए । उनले नवनिर्वाचित जिल्ला समितिलाई बधाई तथा शुभकामना दिँदै संगठन सुदृढीकरण, आगामी कार्यदिशा र पार्टी निर्माणका विषयमा प्रशिक्षणसमेत दिएका थिए । भेलामा सहभागी नेताहरूले संगठन विस्तार, जनपरिचालन तथा वैज्ञानिक समाजवादको पक्षमा जनचेतना अभिवृद्धि गर्ने अभियानलाई थप प्रभावकारी बनाउने प्रतिबद्धता व्यक्त गरेका थिए ।