जेठ २६ – विप्लव नेतृत्वको नेपाल कम्युनिष्ट पार्टी र नेकपा (माओवादी केन्द्र) परित्याग गरी १८ जना नेता तथा कार्यकर्ताहरू नेपाल कम्युनिष्ट पार्टी (बहुमत) मा एकताबद्ध भएका छन् । उनीहरूले आज संयुक्त प्रेस वक्तव्य जारी गर्दै आफूहरू नेकपा (बहुमत) मा औपचारिक रूपमा प्रवेश गरेको घोषणा गरेका हुन् । वक्तव्यमा उल्लेख भएअनुसार, उनीहरूले विद्यमान व्यवस्था, संसदीय राजनीतिलाई दलाल पुँजीवादी र साम्राज्यवादको दलदल भनेका छन् । उनीहरूले वैज्ञानिक समाजवादको स्थापनामार्फत मात्र मुलुकको मुक्ति सम्भव रहेको धारणा व्यक्त गरेका छन् ।
वक्तव्यमा भनिएको छ, नेपाली सर्वहारा वर्गको आधारभूत क्रान्तिकारी कार्यभार अझै अधुरो छ । उत्पादन क्रान्ति वा चुनावी बाटोमार्फत यो कार्यभार पूरा गर्न सकिन्छ भन्नु जनतामाथिको धोका हो । त्यस्तै, उनीहरूले वर्तमान दलाल पुँजीवादी व्यवस्थाको अन्त्य गरी वैज्ञानिक समाजवादी सत्ता स्थापना गर्नुपर्ने मत राखेका छन् । उनीहरूको विचारमा जनताको सशक्तिकरणका लागि शिक्षा, स्वास्थ्य र आवास निःशुल्क हुनुपर्छ भने निजी बैंक प्रणाली अन्त्य गरी दलाल पुँजीको राष्ट्रियकरण आवश्यक छ । नेकपा (बहुमत) को “जनसंघर्ष हुँदै जनविद्रोह” को नीति र “स्वाधीन संयुक्त सरकार” को प्रस्तावलाई उनीहरूले नेपाली क्रान्तिको वैचारिक तथा राजनीतिक विकल्पको रूपमा स्वीकार गरेका छन् ।
एकताबद्ध हुनेमा केन्द्रीय तहदेखि जिल्लास्तरसम्मका नेताहरू छन् । मुख्य रुपमा माओवादी केन्द्रबाटका केन्द्रीय सदस्य त्रिपाल तामाङ र नेकपाका केन्द्रीय प्रतिनिधि सदस्य किरण घिमिरे सहित सिन्धुपाल्चोक जिल्लाका विभिन्न तहगत संरचनामा कार्यरत सचिवालय र जिल्ला सदस्यहरू एकताबद्ध भएका हुन् । यसै गरी समाजसेवी जिवी बज्र लामा र माओवादी केन्द्रका केन्द्रीय सल्लाहकार समिति सदस्य सोनाम तामाङले पनि नेकपा (बहुमत) रोजेका छन् ।