तेलअविव । इरानका सर्वोच्च नेता आयतोल्लाह अल खामेनीले इजराइली आक्रमणको जवाफ दिने बताएका छन् ।
शुक्रबार बिहान इजराइलले इरानमाथि ब्यालिस्टिक मिसाइल र ड्रोन हमला गरेपछि खामेनीले त्यसको जबाफ दिने बताएका हुन् । उनले इरानले दिने जवाफ कडा र कठोर हुने चेतावनी दिएका छन् ।

‘यो अपराधका साथ यहुदी शासकले आफूलाई तीतो र पीडादायी भाग्यको लागि तयार पारेको छ र उसले यसको परिणाम भोग्ने निश्चित छ,’ खामेनीले भनेका छन् ।

इरानमा आक्रमण गरेपछि इजराइलले देशभरि आपतकाल घोषणा गरेको छ । इजराइलले इरानको सम्भावित जवाफको पूर्वतयारीस्वरूप देशव्यापी आपतकाल घोषणा गरेको हो । विद्यालय बन्ददेखि अस्पतालमा समेत बहिरंग बाहेकका सेवा बन्द गर्न निर्देशन दिइएको अन्तर्राष्ट्रिय सञ्चारमाध्यमहरूले जनाएका छन् । मानिसहरूलाई अत्यावश्यक कामबाहेक घरबाहिर ननिस्कन भनिएको छ भने भेला गर्न पनि रोक लगाइएको छ । साथै सेनालाई पनि तयार रहन भनिएको छ ।

इजराइली प्रधानमन्त्री बेन्जामिन नेतन्याहूले इजराइलमाथि सुरक्षा चुनौती देखिएका कारण हमला गरिएको भनेका छन् ।
उनले इरानी आणविक भट्टी र हतियार कारखाना नष्ट नपारून्जेल आक्रमण जारी रहने पनि बताएका छन् ।
इरानमा आक्रमण गर्नुअघि प्रधानमन्त्री नेतन्याहूले आफ्नो मुख्य सहयोगी अमेरिकासँग परामर्श गरेका थिए ।

अमेरिकालाई जानकारी गराएपछि इजराइलले इरानी आणविक भट्टी, हतियार कारखाना, आणविक हतियार उत्पादनमा खटिएका वैज्ञानिक र सैनिक उच्च अधिकारीहरूलाई लक्ष्य गरेर आक्रमण गरेको हो । इजराइलको आक्रमणमा इरानको शक्तिशाली सैन्य संगठन इस्लामिक रिभोलुसनरी गार्ड कोर (आइआरजिसी)का प्रमुख मेजर जनरल हुसेन सलामीको मारिएका छन् । उनीसँगै सेनाका अरू तीन प्रमुख अधिकारी पनि मारिएको भनेर अन्तर्राष्ट्रिय सञ्चारमाध्यमहरूले जनाएका छन् ।
इजराइलले आइआरजिसीको मुख्यालयमै हवाई आक्रमण गरेको बताइएको छ । सोही आक्रमणमा उनको मृत्यु भएको बताइएको छ । इसराइलले इरानमाथि आक्रमण गरेपछि संयुक्त राज्य अमेरिकाले पनि इरानलाई चेतावनी दिएको छ । अमेरिकाको यो चेतावनीबाट इजरेललाई इरानमाथि महला गर्न अमेरिकाले लगाएको स्पष्ट हुन्छ ।

अमेरिकी विदेशमन्त्री मार्को रूबिओले एक वक्तव्य जारी गर्दै मध्यपूर्वमा रहेको अमेरिकी सैन्य अखडाहरूमाथि आक्रमण नगर्न चेतावनी दिएका छन् । उनले इजराइलले इरानमा गरेको आक्रमणमा अमेरिकाको कुनै संलग्नता नरहने पनि बताएका छन् ।