काठमाडौं । सांसद सूर्य थापा सत्तारुढ दल नेपाली कांग्रेसप्रति आक्रोशित देखिएका छन् । आइतबार बजेटमाथिको छलफलका क्रममा सांसद थापाले कांग्रेसबाट सरकारको नेतृत्व गरिरहेका उपप्रधानमन्त्री तथा शहरी विकासमन्त्री प्रकाशमान सिंहसँगको असन्तुष्टि पोखेका हुन् ।

उनले प्रधानमन्त्री केपी शर्मा ओलीलाई टिमको पुनर्मूल्यांकन गर्न आग्रह गरे । ‘कोको मन्त्रीले संयुक्त सरकार हो भनेर हेक्का राखेर काम गर्नुपर्ने हो । यदि त्यो हुन्न भने प्रधानमन्त्रीज्यूले आफ्नो टिमको पुनर्मूल्यांकन गर्नुपर्छ,’ उनले भने ।
सिंहले आफ्ना बुवा गणेशमानको निष्ठालाई समेत ख्याल नगरेर बजेटमा बेइमानी गरेको थापाको आरोप छ ।

‘शहरी विकास मन्त्रालय सबैभन्दा लथालिङ्ग मन्त्रालय बनेको छ । जनताको पक्षमा ध्यान छैन । प्रकाशमान सिंह गणेशमानको छोरा हुनुहुन्छ भन्ने साथीहरूले सुनाउनुभयो । हुनुहुन्छ कि हुनुहुन्न, त्यो मलाई थाहा छैन,’ थापाले भने ।