काठमाडौं । नेकपा (बहुमत) निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी)ले सरकारले जनविरोधी शिक्षा ऐन जारी गर्न लागेको भन्दै त्यसका विरुद्ध आगामी साउन २ गते देशभर एकदिने शैक्षिक हड्ताल गर्ने घोषणा गर्दैछ । सो संघर्षमा भौतिक र नैतिक समर्थन सहितको ऐक्यबद्धताका लागि सो संगठनले सबैमा अपील गरेको छ ।

नागरिकहरुको मौलिक हक र नैसर्गिक अधिकारको रुपमा रहेको निःशुल्क, समान र वैज्ञानिक शिक्षा सहितको जनपक्षीय शिक्षा ऐन जारी गराउन र शिक्षा क्षेत्रमा पैसा हुने र नहुनेका बीचमा विद्यमान चरम विभेदको अन्त्य गर्न सो हड्तालको आयोजना गर्न लागिएको सो संगठनले जनाएको छ ।

त्यस्तै सो संगठनले नेपालको संविधान, २०७२ को भाग ३ धारा ३१ मा प्रत्येक नागरिकलाई आधारभूत तहसम्मको शिक्षा अनिवार्य र निःशुल्क तथा माध्यमिक तहसम्मको शिक्षा निःशुल्क पाउने हक भनी गरिएको व्यवस्था कार्यान्वयन गराउनका लागि तथा विद्यार्थीहरुलाई स्वदेशमै अध्ययन र रोजगारीको वातावरण निर्माणका लागि दबाब सिर्जना गर्न पनि हड्तालको आयोजना गरिएको बताइएको छ ।

यसअघि सो संगठनको तर्फबाट अध्यक्ष वीरेन्द्र शाहले शिक्षामा राजनीतिक हस्तक्षेप तथा दलालीकरण र माफियाकरणको अन्त्य गर्न तथा
सामुदायिक विद्यालयको स्तरोन्नति गर्नुका साथै, शिक्षक र विद्यालय कर्मचारीहरुका समस्याहरु समाधान गरि गुणस्तरीय शिक्षा कायम गर्न आफूहरुले संघर्षका कार्यक्रम घोषणा गरेको बताएका थिए ।