कास्की । नेकपा (बहुमत) निकट विद्यार्थी संगठन अनेरास्ववियु क्रान्तिकारीले कास्कीमा एकजना विद्यालय व्यवस्थापन समिति अध्यक्षलाई कालोमोसो दलेर जनकारवाही गरेको छ ।

पोखराको चर्चित पर्यटकीय स्थल डेबिड फल्सको जग्गामा मिलिभगत गरी लुट मच्चाएको आरोपमा छोरेपाटन माविका विद्यालय ब्यवस्थापन समितिका अध्यक्ष बद्रिनाथ पहारीलाई अखिल (क्रान्तिकारी) कालोमोसो दलेको छ ।

सो संगठनका गण्डकी प्रदेश संयाेजक राजन साउदले संगठनको तर्फबाट एक विज्ञप्तिमार्फत् सो घटनाको जिम्मेवारी लिएका छन् । विज्ञप्तिमा  संयाेजक साउदले पहारीलाई जनकारवाही गर्नुको कारण बारे स्पष्ट पारेका छन् ।

२२०० विद्यार्थीले पढ्दै आएको विद्यालयको आयस्रोतको रुपमा रहेको पाताले छाँगोलाई विद्यालयलाई करोडौं घाटा लाग्नेगरी पाताले छाँगोलाई कमिसन खाइ पोखरा महानगरहुँदै निजी कम्पनीलाई ठेक्का दिने सम्झौता गरेको, पोखरा महानगरले ४ किस्ताका दरले वार्षिक ३ करोड रुपैयाँ विद्यालयलाई दिने सम्झौता गरेको भएपनि २ किस्ता नदिँदासम्म पनि कमिसन खाइ चुप लागेर बसेकोले उनीमाथि जनकारवाही गरिएको  संयाेजक साउदले विज्ञप्तिमा जनाएका छन् ।

साथै विज्ञप्तिमा सो सम्झौतामा हस्ताक्षर गर्ने विद्यालयका प्रधानाध्यापक डिल्लीराम शर्मालाई पदबाट राजीनामा दिन चेतावनी दिँदै राजीनामा नदिए संगठनले जनकारवाही गर्ने चेतावनी दिइएको छ ।

साथै विज्ञप्तिमा सम्झौतामा संलग्न तत्कालिन जनप्रतिनिधिहरु, कर्मचारी, हालका जनप्रतिनिधिहरु सबैले पाताले छाँगो सम्बन्धि ठेक्का सम्झौता तत्काल रद्ध गरी सो पाताले छाँगो विद्यालयले नै भोगचलन गर्नेगरी पुनः सुचारु गर्न अनुरोध गरिएको छ । साथै विज्ञप्तिमा पाताले छाँगोको ठेक्का प्रकृयामा रहेको सेती क्यानोन प्रालिका अध्यक्ष करकेनकुमार गुरुङले सो ठेक्कासम्बन्धि कामकारवाही रोक्नसमेत अनुरोध गरिएको छ ।