काठमाडौं । नेकपा (बहुमत)ले नेपालका संसदवादी दलहरुमा चरम राजनीतिक संकट पैदा भएको निष्कर्ष निकाल्दै यस्तो अवस्थामा देशभक्त शक्तिहरुको नेतृत्वमा स्वाधीन संयुक्त सरकार गठनका लागि तेस्रो जनआन्दोलनको तयारी गर्नु पर्नेमा जोड दिएको छ ।
बैठकले नेपालका संसदवादी राजनीतिक पार्टीहरुमा देखिएको समस्याको विश्लेषण गर्दै सबै संसदवादी दलहरुमा विखण्डन रहेको बताएको छ ।

सो पार्टीले देशको राजनीतिक व्यवस्था र जनताका बीचमा चरम अन्तरविरोध पैदा भएको भन्दै यो अवस्थामा स्वाधीन संयुक्त सरकार गठनका लागि तेस्रो जनआन्दोलनको तयारी गर्ने निर्णय गरेको छ । सो पार्टीको नवौं केन्द्रीय समितिको तेस्रो बैठकले गरेका निर्णयहरु सार्वजनिक गर्न मंगलबार संवाद डबलीमा आयोजित पत्रकार सम्मेलनमा वितरित प्रेस विज्ञप्तिमा यस्तो जनाइएको छ ।

विज्ञप्तिमा रुसी क्रान्तिका नेता कमरेड लेनिनद्वारा प्रस्तावित जनवादी केन्द्रीयतको संगठनात्मक विधिमा विकास गर्दै नेतृत्व प्रणाली र मूल्यांकन विधिको नीति तय गरिएको जनाइएको छ ।
साथै अमेरिका लगायत साम्राज्यवादीहरुले विश्वका श्रमजीवी जनता र कमजोर राष्ट्रमाथि युद्ध थोपरेकोले विश्व विस्फोटको संघारमा पुगेको भन्दै साम्राज्यवादका विरुद्ध उत्पीडित जनता र राष्ट्रहरुले प्रतिवाद गर्न जरुरी भएको सो पार्टीको धारणा रहेको छ ।
साथै पार्टीले साम्राज्यवादले थोपरेको युद्ध तत्काल बन्द गर्न र मानवसंहार रोक्न पनि आह्वान गरेको छ ।
पत्रकार सम्मेलनमा सो पार्टीका महासचिव धर्मेन्द्र बास्तोलाले पत्रकारले उठाएका प्रश्नका जवाफ दिएका छन् । एक प्रसंगमा उनले नेपालको संसदवादी दलहरु र तिनले बनाएको संविधान र काुननले महलिा र आदिवासीहरुमाथि दमन थोपरेको भन्दै पूर्ण क्रान्तिले मात्र यो समस्याको हल गर्ने बताए ।

महासचिव बास्तोलाले नेपालमा जात व्यवस्थाले मानिसहरुलाई जबरजस्ती सिमान्कृत र खण्डिकरण गर्दै लगेको भन्दै जात व्यवस्था समाप्त गर्नुपर्नेमा जोड दिए ।

महासचिव बास्तोलाले विदेशीको दलाली गरेर नेपालको व्यवस्थाले नेपाली युवालाई विदेश लखेटेर देशकै अस्तित्व समाप्त पार्ने अवस्था सिर्जना गरेकोले यो व्यवस्थाको छिटो अन्त्यको आवस्यकता परिसकेको बताए ।

पत्रकारले सोधेको एक प्रश्नको जवाफमा बास्तोलाले आफ्‌नो पार्टीका कुनै सैद्धान्तिक मतभेद नभएको भन्दै समाजवादी गणतन्त्र स्थापनाको दिशामा आफ्‌नो पार्टी निरन्तर संघर्षमा रहेकोमा जोड दिए ।