काठमाडौं । सन्दीप लामिछानेले ५ विकेट लिएपछि नेपालले अस्ट्रेलियन क्यापिटल टेरिटोरी (एसीटी)माथि सानदार जीत निकालेको छ । आज बिहान भएको पहिलो टी–२० अभ्यास खेलमा नेपाल ४१ रनले विजयी भएको हो ।

नेपालले दिएको १७८ रनको लक्ष्य पछ्याएको एसीटीले १७.२ ओभरमा सबै विकेट गुमाउँदै १३६ रन मात्रै बनाएको हो । नेपालका लागि लामिछानेले सन्दीपले सर्वाधिक ५ विकेट लिए। ४ ओभर बलिङ गरेका उनले ३१ रन खर्चिदै ह्याट्रिक गरेका हुन् । यसैगरी करण केसीले २ विकेट, रुपेश सिंह, गुल्सन झा र कुशल भुर्तेलले १/१ विकेट लिए ।

टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाउँदै १७७ रन बनाएको थियो । नेपालका लागि ओपनर आशिफ शेखले सर्वाधिक ६९ रन बनाए । ३८ बलमा आशिफले ४ चौका र ५ छक्का प्रहार गरे । यसैगगरी कप्तान रोहितकुमार पौडेलले ३६ रन, आरिफ शेखले २४ र दीपेन्द्रसिंह ऐरीले २१ रनको योगदान गरेका थिए ।