काठमाडौं । नेकपा (बहुमत)ले जेनजी पुस्ताले गरेको प्रदर्शनमा केपी ओली सरकारले गरेको दमनमा परि दर्जन बढीको मृत्यु र सयौंको संख्यामा घाइते भएको घटनाप्रति आपत्ति जनाएको छ ।
सो पार्टीका महासचिव धर्मेन्द्र बास्तोलाले आज एक विज्ञप्ति जारी गर्दै भ्रष्टाचार र बेथितिका बिरुद्ध जनआवाज बन्द गर्न सामाजिक सञ्जाल बन्द गरेको भन्दै ओली सरकारले आन्दोलनकारी युवामाथि गरेको अमानवीय दमनको आपत्ति जनाएका छन् ।

आफ्‌नो पार्टीले युवाहरुबाट अभिव्यक्त भ्रष्टाचार र कुशासन बिरुद्धको आवाजलाई सम्मान गरेको भन्दै बास्तोलाले दलाल पुँजीवादी सरकारको बिरोध गर्दा हत्या गरिएका नागरिकलाई तत्काल क्षतिपूर्ति दिन माग गरेका छन् । विज्ञप्तिमा गिरफ्तार भएका सबैलाई तुरुन्त रिहाइको माग पनि गरिएको छ ।

विज्ञप्तिमा बास्तोलाले भनेका छन्,‘दलाल पुँजीवादी सत्ताको चरित्र नै भ्रष्टाचारमुखी हुने भएकोले हाम्रो पार्टी युवा पुस्तालाई भ्रष्टाचार र बेतिथिका बिरुद्ध मात्र नभएर सबैकालागि शिक्षा र स्वास्थ्यको निशुल्क उपलब्धता, रोजगारीको अवसर सिर्जना गर्न राष्ट्रिय उद्योगहरुको स्थापना, कृषिमा आधुनिकीकरण, जन्मसिद्ध जमिनमा अधिकार हुने वैज्ञानिक भूउपयोग नीति, हरेक नागरिकको सामाजिक सुरक्षा प्राप्त हुने आन्दोलनमा केन्द्रित गर्न आह्वान गर्दछ ।’

विज्ञप्तिमा उनले दलाल पुँजीवादी सत्ताबाट पछिल्लो पुस्ताका माग सम्बोधन हुन असम्भव भएको भन्दै वास्तविक परिवर्तनकालागि तत्काल दलाल पुँजीवादी सत्ताको अन्त्य गरी स्वाधीन संयुक्त सरकार गठनतर्पm अघि बढ्न माग गरेका छन् ।