राष्ट्रपति रामचन्द्र पौडेलले देशको वर्तमान जटिल परिस्थितिबाट निस्कन संवैधानिक बाटो नै प्रमुख उपाय भएको बताएका छन् । उनले लोकतान्त्रिक प्रणालीको संरक्षण र शान्ति–सुरक्षा कायम राख्न सबै सरोकारवालाहरूलाई सहयोग र सहकार्य गर्न आह्वान गरेका छन् । राष्ट्रपतिले बिहिबार जारी गरेको सन्देशमा अहिले देश कठिन मोडमा रहेको र यस अवस्थाबाट छिटो समाधान निकाल्न संवैधानिक दायराभित्र रहेर मात्र सम्भव हुने स्पष्ट गरेका छन् । “लोकतान्त्रिक मूल्य–मान्यता र संस्थाहरूलाई बलियो बनाउन निरन्तर प्रयास भइरहेको छ ।

नागरिकको मागलाई सम्बोधन गर्ने दिशा तर्फ सरकारले छिटो कदम चाल्न जरुरी छ,” वक्तव्यमा उल्लेख छ । राष्ट्रपति पौडेलले विगतका संघर्ष र आन्दोलनका आधारमा स्थापित लोकतान्त्रिक व्यवस्थालाई जोगाउनु सबैको दायित्व भएको उल्लेख गर्दै राष्ट्रिय सहमति र साझा प्रयासमार्फत मात्र शान्ति र स्थिरता कायम गर्न सकिने धारणा व्यक्त गरेका छन् । उनले मुलुकमा देखिएका समस्या समाधानका लागि राजनीतिक नेतृत्व, राज्यका अंगहरू तथा सम्पूर्ण नागरिक समाज एकजुट हुनुपर्नेमा जोड दिएका छन् । “संविधानले दिएको अधिकार र जिम्मेवारीलाई कार्यान्वयन गरेरै मुलुकलाई शान्ति, स्थिरता र सुशासनको दिशातर्फ डार्‍याउन सकिन्छ,” राष्ट्रपति पौडेलको सन्देशमा उल्लेख छ ।