काठमाडौं । नेपालको संसदीय व्यवस्थाको अन्त्य गरी वैज्ञानिक समाजवादी गणतन्त्र स्थापना गर्न चाहने १० वटा कम्युनिष्ट पार्टीहरुले भर्खरै मात्र जेनजीको नाममा गरिएको हिंसात्मक आन्दोलनमा जेनजीको नेतृत्व पश्चगामीहरुको षड्यन्त्रमा परेकोले देशले अनाहकमा क्षति व्यहोर्न परेको निष्कर्ष निकालेको छ ।

आज एक संयुक्त विज्ञप्तिमार्फत् ती पार्टीहरुले दलाल संसदीय व्यवस्थाले लादेका भ्रष्टाचार, बेथिति लगायतका समस्याहरु समाधान गर्न एउटा ठूलो आन्दोलनको आवश्यकता परिसकेको र त्यसको पूर्ती आजका युवा पुस्ताले गर्नु स्वभाविकै भएपनि जेनजी आन्दोलनका नाममा प्रतिगामी तत्वहरुले घुसपैठ गरी फाइदा लिएकोले आज देशको अर्बौंको धनमाल नष्ट हुनु नमजाको विषय बनेको ती पार्टीहरुको विज्ञप्तिको आशय छ ।

जेनजी आदोलनका नाममा दर्जनौं निर्दोष बालबालिका मारिनु र अर्बौंको सम्पति नष्ट गर्ने कार्यले देशलाई प्रतिगमनतिर धकेलेको भन्दै विज्ञप्तिमा यो क्षतिले लामो समयदेखि जनताले संघर्ष गरी प्राप्त गरेको लोकतान्त्रिक अधिकार बिरुद्ध प्रतिक्रान्ति भएको जनाइएको छ ।

साथै विज्ञप्तिको अन्त्यमा जनयुद्ध र २०६२/६३ को जनाअन्दोलनबाट प्राप्त भएका गणतन्त्र लगायतका सिमित अधिकार सहितको नागरिक सर्वोच्चता अपहरण भएको वर्तमान राजनीतिक परिस्थितिको अन्त्य गर्न राजनीतिमा उदियमान नयाँ पुस्ताको नेतृत्व निरन्तर आइरहने विधि र जनताका जनवादी अधिकारहरु सुनिश्चित गर्ने नीति स्थापित गर्दै वैज्ञानिक समाजवाद स्थापनाको बाटोमा अघि बढ्न स्वाधीन अन्तरिम संयुक्त सरकार निर्माण गर्नका लागि देशभक्त, जनवादी, क्रान्तिकारी शक्तिहरुमा अपील गरिएको छ ।