काठमाडौं । चीनले अमेरिकालाई जापानमा तैनाथ गरेको उसको मिड रेन्जको टाइफुन मिसाइल प्रणाली हटाउन चेतावनी गरेको छ । चीनले यो तैनाथीले यस क्षेत्रको रणनीतिक सुरक्षामा गम्भीर खतरा पुर्‍याउने बताएको छ ।

चिनियाँ विदेश मन्त्रालयका प्रवक्ता लिन जियानले चीनको गम्भीर आपत्तिलाई बेवास्ता गर्दै अमेरिका र जापानले संयुक्त सैन्य अभ्यासको नाममा टाइफुन मिसाइल प्रणालीको तैनाथी जारी राखेको आरोप लगाए ।

यो जमिनबाट प्रक्षेपण हुने हतियारले दुई हजार किलोमिटरसम्म मार हान्न सक्ने टम हक मिसाइलहरू प्रहार गर्न सक्छ । यसको अर्थ यसले दक्षिण चीन सागर, ताइवान स्ट्रेट र चीनका दक्षिणी भागहरूलाई पनि निसाना बनाउन सक्छ ।

लिन जियानले भने, “एसियाली देशहरूमा टाइफुन मिसाइल प्रणालीको अमेरिकी तैनाथीले अन्य देशहरूका लागि खतरा बढाउँछ । यसले यस क्षेत्रमा हतियारको दौड र सैन्य टकरावको खतरा बढाउँछ र रणनीतिक सुरक्षामा गम्भीर असर पार्छ ।”

उनले अमेरिका र जापानले अन्य देशहरूको सुरक्षा चिन्ताको सम्मान गर्नुपर्ने र क्षेत्रीय शान्ति र स्थिरताका लागि सकारात्मक भूमिका निर्वाह गर्नुपर्ने बताए ।

विभिन्न मिडिया रिपोर्टहरूका अनुसार, जापानमा यो मिसाइल प्रणाली विशेषगरी संयुक्त सैन्य अभ्यास ‘रेजोलुट ड्रयागन’ का लागि तैनाथ गरिएको हो, जुन १६ देखि २५ सेप्टेम्बरसम्म चलिरहेको छ ।

यो अभ्यासमा १९ हजारभन्दा बढी अमेरिकी र जापानी सैनिकहरूले भाग लिइरहेका छन् । ताइवान, सेनकाकु टापु र पूर्वी चीन सागरमा तनावको बीचमा यो अभ्यास अमेरिका–जापान गठबन्धनको शक्ति प्रदर्शन गर्नका लागि गरिएको हो ।

हालै चीनको नयाँ विमानवाहक जहाज फुजियन जापाननजिकै देखिएपछि जापानको सुरक्षा चिन्ता बढेको छ ।

जापानले चीन, उत्तर कोरिया र रूसको मिसाइल धम्कीहरूको सामना गर्नका लागि मिड–टु–लङ रेन्ज मिसाइलहरूमा ध्यानकेन्द्रित गरेर आफ्नो शक्ति बढाउँदै छ । टाइफुनले फर्स्ट आइल्यान्ड चेन (जापान–ताइवान–फिलिपिन्सको रक्षा रेखा)लाई बलियो बनाउँछ ।

अमेरिकाले यो मिसाइल दक्षिण चीन सागरमा फिलिपिन्सनजिक तैनाथ गरेको थियो । त्यतिबेला पनि चीनले यसलाई लिएर आपत्ति जनाएको थियो ।

अमेरिकाले पहिलोपटक अप्रिल २०२४ मा टाइफुन प्रणाली फिलिपिन्स पठाएको थियो । यो संयुक्त सैन्य अभ्यासका लागि आएको थियो र यो नै यसको पहिलो विदेशी तैनाथी थियो । फिलिपिन्सले टाइफुन प्रणाली स्थायी रूपमा लिन रुचि देखाएको छ ।