महाराष्ट्र (भारत), असार २६ । नेपाल कम्युनिस्ट पार्टी (बहुमत) भारत उपब्युरो अन्तर्गत जिल्ला नं. ३, महाराष्ट्रको जिल्ला भेला सम्पन्न भएको छ । भेलाले राम बिकको नेतृत्वमा ९ सदस्यीय जिल्ला समिति सर्वसम्मत रूपमा चयन गरेको जनाएको छ । भेलामा पार्टीका विदेश विभाग इन्चार्ज देविदत्त पाण्डे (प्रतिक) प्रमुख अतिथिका रूपमा उपस्थित थिए। त्यसैगरी पार्टीका केन्द्रीय सदस्य शीतलको विशेष आतिथ्यता रहेको थियो ।
कार्यक्रमलाई सम्बोधन गर्दै प्रमुख अतिथि पाण्डेले प्रवासी नेपाली श्रमिकहरूबीच पार्टी संगठनलाई अझ सुदृढ बनाउँदै जनपक्षीय आन्दोलनलाई प्रभावकारी रूपमा अगाडि बढाउनुपर्ने आवश्यकता औँल्याए । उनले पार्टीको राजनीतिक लाइनलाई जनतामाझ पुर्‍याउन जिल्ला समितिले सक्रिय भूमिका निर्वाह गर्नुपर्नेमा जोड दिए ।
भेलाले समसामयिक राजनीतिक परिस्थिति, संगठन विस्तार तथा आगामी कार्ययोजनाबारे समेत छलफल गरेको थियो । नवगठित जिल्ला समितिले संगठनलाई थप सुदृढ, अनुशासित र जनमुखी बनाउँदै भारतमा रहेका नेपाली समुदायबीच पार्टीका गतिविधिलाई प्रभावकारी रूपमा सञ्चालन गर्ने प्रतिबद्धता व्यक्त गरेको छ ।