काठमाडौँ । अविरल वर्षाका कारण देशका विभिन्न स्थानमा बाढी, पहिरो, डुबान र सडक दुर्घटनाबाट जनजीवन अस्तव्यस्त बनेको प्रति नेपाल कम्युनिष्ट पार्टी (बहुमत) ले गहिरो दुःख व्यक्त गर्दै तत्काल राहत, उद्धार र सहयोगका लागि सरकार र सिंगो पार्टी पंक्ति दुवैलाई आह्वान गरेको छ ।
पार्टीका केन्द्रीय कार्यालय सचिव अविरलद्वारा शनिबार जारी प्रेस वक्तव्यमा जल तथा मौसम विज्ञान विभाग र राष्ट्रिय विपत् जोखिम न्यूनीकरण तथा व्यवस्थापन प्राधिकरणको पूर्वानुमानअनुसार अझै केही दिन वर्षा जारी रहने भएकाले सतर्कता अपनाउन सबैलाई आग्रह गरिएको छ । वक्तव्यमा भनिएको छ, “देशभर बाढी–पहिरो, डुबान र सडक अवरोधका कारण सर्वसाधारणको जनजीवन संकटमा परेको छ। धेरै ठाउँमा जनधनको क्षति भएको छ र हजारौँ जनता विस्थापित भएका छन् ।”
पार्टीले विपद्बाट प्रभावित जनतालाई तत्काल सहयोग पुर्‍याउन, उद्धार कार्यमा सहभागी हुन र राहत संकलन अभियान सञ्चालन गर्न आफ्ना सम्पूर्ण संगठन, मोर्चा र भ्रातृ संघ–संस्थालाई निर्देशन दिएको छ । वक्तव्यमा भनिएको छ, “संकटका बेला जनताको साथमा उभिनु नै पार्टीको जिम्मेवारी हो । सबै पंक्तिहरूले प्रभावित जनतालाई सहयोग पुर्‍याउन अग्रसर हुनुपर्छ ।”
नेकपा (बहुमत) ले अविरल वर्षा र विपत्‌का कारण प्रभावित जनताको राहत, पुनःस्थापना र क्षतिपूर्ति सुनिश्चित गर्न राज्य संयन्त्रलाई सक्रिय र जिम्मेवार बन्न समेत माग गरेको छ ।