२३ असोज, काठमाडौं । नेकपा (एमाले) का अध्यक्ष केपी शर्मा ओलीले प्रतिनिधि सभा विघटनलाई असंवैधानिक भन्दै पुनर्स्थापनाको मागसहित आन्दोलनमा उत्रिने घोषणा गरेका छन् । भक्तपुरको गुण्डुमा आयोजित कार्यक्रममा उनले लोकतन्त्र र संविधानको पुनर्बहालीका लागि तत्काल कदम चाल्नुपर्ने बताए । ओलीले भने, “संसद् विघटन असंवैधानिक, गलत, गैरकानूनी र अलोकतान्त्रिक कदम हो । यो देशहितका विरुद्ध छ । कतिपय भन्छन् फागुन २१ पछि मात्रै संसद् पुनर्स्थापनाको माग गरौंला, तर हामी त्यो पर्खंदैनौं । अहिले नै कदम चाल्नुपर्छ ।”

उनले प्रतिनिधि सभा पुनर्स्थापनाको मागमा जनता सडकमा उत्रिने विश्वास पनि व्यक्त गरे । “हामी अगाडि बढ्ने बेला आएको छ । नेपाली जनता आन्दोलनको आँधी–तुफान सिर्जना गरेर अघि बढ्नेछन्,” ओलीको भनाइ थियो । कार्यक्रममा ओलीले संसद् विघटनको कारण तत्कालीन प्रधानमन्त्री शीला कार्कीको अडानसँग पनि जोड्दै असंवैधानिक ढंगले संसद् भंग गरिएको टिप्पणी गरे । उनले भने, “संविधान मिच्ने अधिकार कसैले पाएको छैन । संसद् र संविधान जोगाएर निकास खोज्ने सहमति हुँदाहुँदै असंवैधानिक निर्णय लिइयो ।”

ओलीका अनुसार संसद् पुनर्स्थापनाको एजेण्डामा कांग्रेससहित अन्य दलहरूको पनि समर्थन रहनेछ । उनले थपे, “संविधान र संसद् कायम राखेर समाधान खोज्नेमा सबैको सहमति थियो, तर राजनीतिक दलहरूलाई पन्छाएर संसद् विघटन गरियो, जुन गलत कदम हो ।” एमाले अध्यक्ष ओलीले अन्त्यमा भने, “अब समय ढिलो गर्न मिल्दैन । हामी लोकतन्त्र र संविधानको रक्षा गर्न जनशक्तिसहित आन्दोलनमा उत्रिनेछौं ।”