काठमाडौं, असोज ३१ – नेपालले आइसिसी पुरुष टी–२० विश्वकपअन्तर्गत एसिया तथा इस्ट एसिया प्यासिफिक छनोटमा अपराजित रहँदै उपाधि जितेको छ । ओमानको अल अमेरात क्रिकेट मैदानमा सम्पन्न प्रतियोगितामा सहभागी नौ टोलीमध्ये नेपालले सुपर सिक्स चरणमा सर्वाधिक १० अंक जोड्दै च्याम्पियन बनेको हो । सुपर सिक्सको अन्तिम खेलमा नेपालले सामोआलाई एक सय २४ रनको फराकिलो अन्तरले हराउँदै उपाधि हात पारेको हो । पहिलो ब्याटिङ गर्दै नेपालले २० ओभरमा चार विकेट गुमाएर दुई सय ११ रनको विशाल योगफल बनायो । जवाफी ब्याटिङमा सामोआले २० ओभरमा सात विकेट गुमाउँदै ८७ रन मात्र बनाउन सक्यो ।
नेपालका आसिफ शेख र दीपेन्द्रसिंह ऐरीले अर्धशतकीय इनिङ्स खेलेका थिए । आसिफले ४१ बलमा सात चौका र चार छक्कासहित ६९ रन बनाए भने दीपेन्द्रले ३३ बलमा चार छक्का र दुई चौकासहित ५३ रनको योगदान गरे । लोकेश बम ३९ रनमा अविजित रहे । बलिङतर्फ ललित राजवंशीले तीन विकेट लिए । नेपालका कप्तान रोहितकुमार पौडेलले भने, “हामी भारतका लागि टिकट काट्न सफल भएका छौँ । अब भारत, इंग्ल्यान्ड र अस्ट्रेलियाजस्ता टिमसँग खेल्ने अवसर पाउनेछौँ । यो हाम्रो लागि गर्वको विषय हो ।”
ओमानले पाँच खेलबाट ८ अंक जोड्दै दोस्रो स्थान हासिल गर्‍यो भने युएई ६ अंकसहित तेस्रो स्थानमा रह्यो । यी तीन टोली—नेपाल, ओमान र युएई—ले आगामी वर्ष फेब्रुअरी ७ देखि मार्च ८ सम्म भारत र श्रीलंकामा आयोजना हुने टी–२० विश्वकपमा सहभागी हुनेछन् ।