काठमाडौँ । गृहमन्त्री ओमप्रकाश अर्यालको अध्यक्षतामा केन्द्रीय सुरक्षा समितिको बैठक आज बस्दै छ । आगामी निर्वाचनलाई लक्षित गरी सुरक्षा व्यवस्थापनका विषयमा केन्द्रित बैठकमा गृह र रक्षा सचिवसहित चारवटै सुरक्षा निकायका प्रमुख तथा प्रतिनिधिहरू सहभागी हुने छन् । बैठकले केन्द्रीय एकीकृत निर्वाचन सुरक्षा समितिले तयार पारेको एकीकृत सुरक्षा योजनाको प्रगति समीक्षासँगै आवश्यक पृष्ठपोषण र नीतिगत निर्देशन दिनेछ ।
गृह मन्त्रालयको शान्ति, सुरक्षा तथा अपराध नियन्त्रण महाशाखाका प्रमुख सहसचिव आनन्द काफ्लेको नेतृत्वमा गठन गरिएको उक्त समितिले देशभर निर्वाचनका लागि एकीकृत सुरक्षा योजना तयार गरिरहेको छ । गृहमन्त्री अर्यालले कार्यभार सम्हाल्नेबित्तिकै सो समिति गठन गरेका हुन् । समितिमा चारवटै सुरक्षा निकायका प्रतिनिधि सदस्यका रूपमा छन् भने उपसचिव रवीन्द्र अधिकारी सदस्य–सचिवका रूपमा कार्यरत छन् ।
गृह मन्त्रालयका अनुसार समितिले तयार पारेको योजना छिट्टै सबै जिल्लामा पठाइनेछ । प्रमुख जिल्ला अधिकारीको नेतृत्वमा गठन हुने जिल्ला एकीकृत निर्वाचन सुरक्षा समितिले सो योजनाको कार्यान्वयन गर्नेछ । गृहमन्त्री अर्यालले निर्वाचन सुरक्षालाई उच्च प्राथमिकतामा राखिएको उल्लेख गर्दै भने, ‘हामी पूर्ण क्षमताका साथ निर्वाचन तयारीमा जुटेका छौँ । एकीकृत निर्वाचन सुरक्षा योजना तीव्र गतिमा बन्दै छ । निर्वाचन आयोगसँग पनि सघन समन्वय भइरहेको छ । सुरक्षा निकायहरूलाई आवश्यक स्रोत–साधनको कुनै कमी नहुने गरी काम भइरहेको छ ।’