जनकपुर, कात्तिक ५ — नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले तोकिएको समयमा निर्वाचन हुने वातावरण अझै बन्न नसकेको बताएका छन् । महोत्तरीको रामगोपालपुरमा पार्टी प्रवेश कार्यक्रममा सहभागी हुन जनकपुर आइपुगेका प्रचण्डले जनकपुर विमानस्थलमा पत्रकारहरूसँग कुरा गर्दै आगामी निर्वाचनको तयारीमा सरकारले अपेक्षित सक्रियता नदेखाएको भनी टिप्पणी गरेका छन् । उनका अनुसार, सरकारले निर्वाचनको मिति तोके पनि आवश्यक तयारी र वातावरण निर्माणका काममा ढिलाइ भइरहेको छ । उनले भने, “फागुन २१ गते निर्वाचनको मिति तोकिएको छ, तर अहिलेसम्म चुनावको वातावरण बनेको छैन ।”
प्रचण्डले प्रधानमन्त्री सुशीला कार्कीले दलहरूसँग निर्वाचनसम्बन्धी छलफल सुरु गरेको सकारात्मक संकेत भएको बताए पनि त्यो मात्रै पर्याप्त नभएको जनाए । “हिजो मात्रै प्रधानमन्त्रीले दलहरूसँग कुराकानी गर्नुभयो, त्यसले केही वातावरण बनेको छ, तर अझै सरकारले निर्वाचनका लागि सक्रिय भूमिका खेलेको छैन,” उनले भने । जेन–जी आन्दोलनपछि बनेको अन्तरिम सरकारले घोषणा गरेको निर्वाचन तोकिएको मितिमा नै हुनुपर्नेमा जोड दिँदै प्रचण्डले आफ्नो पार्टी नै समयमै निर्वाचन गराउन आग्रह गर्ने पहिलो दल भएको दाबी गरे । साथै उनले छठ पर्वपश्चात् वाम एकता र सहकार्यका लागि पनि पहल सुरु हुने बताएका छन् ।