जनकपुरधाम । सिरहाको मिर्चैया नगरपालिका–३ छड्की टोलमा एक परिवारमाथि सामूहिक आक्रमण भएको घटनामा संलग्न व्यक्तिलाई उम्काएको र जाहेरी दर्ता नगरेको भन्दै पीडितले प्रहरीमाथि गम्भीर आरोप लगाएका छन् । कात्तिक २ गते बेलुका घरमै प्रवेश गरी आक्रमण हुँदा एकै परिवारका चार जना घाइते भएका हुन् । घाइतेहरूमा ६० वर्षीय शिवनन्दन यादव, उनकी पत्नी दुर्गी देवी यादव (५७), छोरा जमाहिर यादव (४२) र बुहारी रिता यादव (३७) रहेका छन् । स्थानीयवासीका अनुसार १५–२० जनाको समूह घरभित्र पसेर खुकुरी, रड, भाटालगायतका हतियार प्रहार गरेको थियो । घाइतेमध्ये केहीको स्थानीय अस्पतालमा उपचार भइरहेको छ ।
इलाका प्रहरी कार्यालय मिर्चैयाका डिएसपी राजेशराज पुरीले घटना केही दिनअघि आयोजित जीतवाहन मेलामा दुई किशोरबीचको विवादबाट सुरु भएको बताए । मेलाको झडपपछि दुबैतर्फबाट वादविवाद बढ्दै गएर कुटपिटसमेत भएको र त्यसपछि अर्को पक्षले घरमै पुगेर हमला गरेको उनको भनाइ छ । प्रहरीले घटनामा संलग्नता आरोपमा मिर्चैया–३ का पूर्व–वडाध्यक्ष हरिकुशियैत यादव, किशोर धुर्झार यादव, अशोक यादव, जगदीश धुर्झार यादव सहित पाँचजनालाई नियन्त्रणमा लिएको थियो । तर, अनुसन्धानपछि किशोर, पूर्व–वडाध्यक्ष हरिकुशियैत र जगदीशलाई छाडिएको छ । डिएसपी पुरीका अनुसार उनीहरू घटनामा प्रत्यक्ष संलग्न नदेखिएकाले तारेखमा छोडिएको हो । अन्य अशोक यादवसहित दुईजना प्रहरी नियन्त्रणमा रहेका छन् ।
पीडित शिवनन्दन यादवले प्रहरीमाथि राजनीतिक दबाबमा अभियुक्तलाई छाडिएको र जाहेरीसमेत दर्ता नगरिएको आरोप लगाए । उनले भने— “घटनामा संलग्न दोषीलाई प्रहरीले छाडेको छ । जाहेरीमा उनीहरूको नाम हटाएर ल्याए मात्र दर्ता हुन्छ भनेर भनिरहेका छन्। नाम हटाएपछि हामी कसरी न्याय पाउँछौँ ?” यो बारेमा डिएसपी पुरीले भने “पक्राउ परेकामध्ये अन्य दुईजनाको बयान र अनुसन्धानबाट छाडिएका व्यक्ति घटनामा प्रत्यक्ष संलग्न नदेखिएका छन् । संलग्न नभएका व्यक्तिको नाम जाहेरीमा राखेपछि दर्ता गर्न मिल्दैन ।” उनका अनुसार घटनाबारे थप अनुसन्धान भइरहेको छ ।