काठमाण्डौं । नेकपा (एकीकृत समाजवादी) का सम्मानित नेता झलनाथ खनालले नेकपा (माओवादी केन्द्र) सँग अघि बढाइएको एकताको छलफलप्रति असहमति जनाएका छन् । सञ्चारमाध्यमहरूमा आफू पनि सहमत भएको भन्ने समाचार सार्वजनिक भएपछि उनले आफ्नो सचिवालयमार्फत त्यसको खण्डन गरेका हुन् । खनालका प्रेस सहयोगी मिलन उपाध्यायका अनुसार नेता खनाल पार्टी एकीकरण होइन, पार्टी पुनर्गठन र सुदृढीकरणकै पक्षमा छन् । उपाध्यायले भने, “मैले कमरेड झलनाथ खनालसँग प्रत्यक्ष सम्पर्क गरेको थिएँ । उहाँको धारणा स्पष्ट छ — नेकपा (एकीकृत समाजवादी) लाई नै पुनर्गठन र सुदृढीकरण गरेर समाजवादको यात्रामा अगाडि बढाउनुपर्छ भन्ने विश्वासमा उहाँ अडिग रहनुभएको छ ।” खनाल हाल आफ्नी पत्नी रविलक्ष्मी चित्रकारको उपचारका क्रममा भारतको दिल्लीमा छन् । दिल्लीमै रहँदै उनले असोज २६ गते पनि विज्ञप्ति जारी गरी पार्टी एकीकरणको भन्दा संगठन सुदृढीकरणको आवश्यकता रहेको धारणा सार्वजनिक गरेका थिए ।
तर, शुक्रबार एकाएक माओवादी केन्द्रसँग एकताको विषय टुंगिएको र खनाल पनि सहमत भएको समाचार सार्वजनिक भएपछि उनले आफ्नो सचिवालयमार्फत पुनः असहमति प्रकट गरेका हुन् । यसबीच, नेकपा (एकीकृत समाजवादी) का अध्यक्ष माधवकुमार नेपालले पार्टीको केन्द्रीय कमिटी बैठक कात्तिक १२ गतेका लागि बोलाएका छन् । बैठकमा माओवादी केन्द्रसँगको एकता पहल, पार्टीभित्रका असहमतिहरू र संगठन सुदृढीकरणका उपायबारे छलफल हुने जनाइएको छ । पार्टीभित्र खनाल पक्षले संगठनलाई बलियो बनाउँदै नयाँ नीतिगत दिशातर्फ अघि बढ्नुपर्ने धारणा अघि सारेका छन् भने अध्यक्ष नेपाल पक्षले माओवादी केन्द्रसँग एकता वा गठबन्धनका विकल्पहरू खुला राख्ने तयारीमा रहेको बताइन्छ । माओवादी केन्द्र र एकीकृत समाजवादीबीच पछिल्ला महिनाहरूमा वाम एकता र सहकार्यका विषयमा वार्ता हुँदै आएको छ । माओवादी केन्द्रका अध्यक्ष पुष्पकमल दाहाल ‘प्रचण्ड’ र समाजवादी अध्यक्ष माधवकुमार नेपालबीच भएका छलफलहरूलाई पार्टी एकताकै पूर्वतयारीको रूपमा हेरिएको थियो । तर, झलनाथ खनालले सो प्रक्रियाप्रति असहमति जनाउँदै “वाम एकता होइन, समाजवादी पुनर्गठन प्राथमिकता हो” भन्ने धारणा निरन्तर दोहोर्याउँदै आएका छन् ।