काठमाडौँ । मुलुकको पछिल्लो सुरक्षा अवस्थाबारे प्रधानमन्त्री सुशीला कार्कीले शनिबार गृहमन्त्री ओमप्रकाश अर्यालसहित चारवटै सुरक्षा निकायका प्रमुखहरूसँग बालुवाटारमा विस्तृत छलफल गरेकी छन् । प्रधानमन्त्री निवासमा बसेको उक्त बैठकमा गृहसचिव रामेश्वर दंगाल र सेना, सशस्त्र प्रहरी, नेपाल प्रहरी तथा राष्ट्रिय अनुसन्धान विभागका प्रमुखहरू सहभागी थिए । करिब दुई घण्टा लामो बैठकमा देशको समग्र सुरक्षा अवस्था, सम्भावित चुनौतीहरू र आवश्यक तयारीबारे समीक्षा गरिएको थियो । बैठकमा सुरक्षा निकायका प्रमुखहरूले वर्तमान अवस्थाको आफ्ना–आफ्ना विश्लेषण प्रस्तुत गर्दै आगामी दिनमा अपनाइने रणनीतिबारे सुझाव दिएका थिए ।
छलफलपछि सञ्चारकर्मीहरूसँग कुरा गर्दै गृहमन्त्री अर्यालले देशको सुरक्षा अवस्थाबारे सूक्ष्म विश्लेषण गरिएको जानकारी दिए । उनका अनुसार विभिन्न समूहहरूले प्रदर्शनका तयारी गरिरहेको सूचना प्राप्त भएको छ । ‘राजनीतिक मागहरू जिम्मेवार ढङ्गले राख्न सबै स्वतन्त्र छन्,’ उनले भने, ‘राजनीतिक मुद्दाको सम्बोधनका लागि सरकारले संवादको ढोका खुला राखेको छ र सम्बद्ध पक्षहरूसँग वार्ता गर्न तयार छ ।’गृहमन्त्री अर्यालले अहिलेको संवेदनशील अवस्थालाई ध्यानमा राखी सबैलाई संयमित र जिम्मेवार रूपमा प्रस्तुत हुन आग्रह गरे ।बैठकमा प्रधानमन्त्री कार्की, गृहमन्त्री अर्याल, गृहसचिव दंगाल र चारवटै सुरक्षा निकायका प्रमुखहरूको सहभागिता रहेको थियो ।