काठमाडौं । इरान, भारत र नेपाल सम्मिलित त्रिदेशीय मैत्रीपूर्ण महिला फुटबल प्रतियोगितामा नेपालले आयोजक भारतलाई घरेलु मैदानमै पराजित गरेको छ । भारतको सिलोङस्थित जवाहरलाल नेहरू स्टेडियममा मंगलबार भएको खेलमा नेपालले भारतलाई २–१ गोल अन्तरले हराएको हो । नेपालको जितमा कप्तान साबित्रा भण्डारीले दुबै गोल गर्दै निर्णायक भूमिका खेलेकी थिइन् । खेलको सुरुवाती मिनेटमै नेपालले अग्रता लिएको थियो। दोस्रो मिनेटमा साबित्राले दुईजना भारतीय डिफेन्डर र गोलकिपरलाई बिट गर्दै पहिलो गोल गरिन् । खेलको बाइसौँ मिनेटमा प्रीति राईले राम्रो मौका पाए पनि गोल गर्न सकिनन् । ३२औँ मिनेटमा भारतकी दाङमेइ ग्रेसले बराबरीको अवसर गुमाइन् भने ४३ औँ मिनेटमा नेपालकी दिपा शाहीको पासमा साबित्रा भण्डारीको प्रहारलाई भारतीय गोलकिपरले रोक्दै उत्कृष्ट बचाउ गरिन् ।

पहिलो हाफमा १–० को अग्रता लिएको नेपालले दोस्रो हाफमा थप गोल गर्दै जित सुनिश्चित गर्‍यो । खेलको ६३ औँ मिनेटमा फ्री किकमार्फत साबित्राले दोस्रो गोल गरिन् । त्यसअघि ६२ औँ मिनेटमा प्रीति राईमाथि भारतीय खेलाडीले गरेको फाउलपछि नेपालले डिबक्स अगाडि फ्री किक पाएको थियो, जसलाई साबित्राले उत्कृष्ट फिनिसिङ गर्दै गोलमा परिणत गरिन् । भारतले ८१ औँ मिनेटमा करिश्मा पुरुषोत्तमको गोलबाट एक गोल फर्काए पनि त्यसपछि बराबरी गर्न सकेन । ८३ औँ मिनेटमा साबित्राको पासमा प्रीति राईले हानेको बल बार माथिबाट बाहिरिएको थियो । नेपालका लागि अर्को सुखद पक्ष भनेको युवा फरवार्ड मीना देउवाको राष्ट्रिय टिममा डेब्यु हो । ७८ औँ मिनेटमा रेखा पौडेललाई प्रतिस्थापन गर्दै मैदान प्रवेश गरेकी मीनाले जर्सी नम्बर १५ लगाएकी थिइन् । उनले यु–२० टोलीबाट उत्कृष्ट प्रदर्शन गर्दै पहिलो पटक सिनियर टिममा स्थान बनाएकी हुन् । यसअघि नेपालले भारतसँग १९ पटक प्रतिस्पर्धा गरिसकेको छ । त्यसमध्ये ११ खेलमा भारतले, ३ खेलमा नेपालले जित निकालेका छन् भने ४ खेल बराबरीमा टुंगिएका छन् ।