पोखरा । अन्नपूर्ण क्षेत्रमा लगातारको वर्षा र हिमपात भएपछि अन्नपूर्ण आधार शिविर (एबीसी) पदयात्रामा पूर्ण रोक लगाइएको छ । प्रतिकूल मौसमका कारण पदयात्रीहरूको आवागमन कठिन बनेपछि स्थानीय प्रशासन र अन्नपूर्ण गाउँपालिकाले आपतकालीन सूचना जारी गर्दै पदयात्रा अस्थायी रूपमा बन्द गरेको हो । प्राप्त विवरण अनुसार सो क्षेत्रका केही पदयात्रीहरू माथि र तल दुबै दिशामा फसेका छन् । उनीहरूलाई सुरक्षित रूपमा उद्धार गर्न नेपाल प्रहरी, सशस्त्र प्रहरी बल, स्थानीय उद्धारकर्मी तथा इन्द्र शेरचन थकाली नेतृत्वको टोली परिचालन गरिएको छ । उद्धार टोलीले अन्नपूर्ण गाउँपालिकासँग घनिष्ठ समन्वय गर्दै उद्धार र सहजीकरण कार्य अघि बढाइरहेको छ ।
गाउँपालिकाले यात्रुहरूलाई हालको अवस्था सामान्य नहुँदासम्म पदयात्रामा नजान आग्रह गरेको छ। साथै, आवश्यक सहयोग वा सूचना चाहिएमा प्रहरी कन्ट्रोलको १०० नम्बर वा नजिकको प्रहरी कार्यालय तथा अन्नपूर्ण गाउँपालिकाका प्रतिनिधिहरूसँग सम्पर्क गर्न अनुरोध गरिएको छ ।