बाजुरा । जिल्ला अस्पताल बाजुरामा महिनौँदेखि जिवनजल (ओआरएस)को अभाव हुँदा बिरामीहरूले सास्ती खेपिरहेका छन् । असोजको पहिलो सातादेखि नै सकिएको जिवनजल कार्तिक दोस्रो सातासम्म पनि आपूर्ति हुन नसक्दा उपचारमा समस्या आएको हो । झाडापखालाका बिरामीका लागि अत्यावश्यक मानिने जिवनजल निःशुल्क रूपमा वितरण नहुँदा बिरामीहरू बाध्य भएर बाहिरका मेडिकल पसलबाट महँगो मूल्यमा खरिद गर्न बाध्य भएका छन् । बडीमालिका नगरपालिका–७ का स्थानीय मेघराज तिमिल्सेनाले अस्पतालमा जिवनजल नहुँदा बिरामीहरूले ठूलो सास्ती भोग्नुपरेको बताए। उनका अनुसार, “अस्पतालमा निःशुल्क पाउने औषधि बाहिरबाट महँगोमा किन्नुपर्ने अवस्था आएको छ ।”
यता, जिल्ला अस्पताल बाजुराका सूचना अधिकारी नृपराज गिरीका अनुसार नयाँ खरिद प्रक्रियामा ढिलाइ भएकाले जिवनजल समयमै उपलब्ध हुन नसकेको हो । “टेन्डर प्रक्रिया खुलिसकेको छ र मूल्यांकन समिति एक–दुई दिनभित्र मूल्यांकन गरी सम्झौता गर्नेछ,” उनले भने, “कार्तिक महिनाभित्रै जिवनजल खरिद हुनेछ ।” गिरीका अनुसार औषधि खरिदका लागि बजेटको पनि अभाव छ । सरकारले निःशुल्क औषधि वितरणका लागि पर्याप्त रकम नदिँदा समस्या देखिएको उनको भनाइ छ । यस आर्थिक वर्षमा ९८ प्रकारका निःशुल्क औषधिका लागि २६ लाख रुपैयाँ बजेट छुट्याइएको भए पनि उक्त रकम अपुग भएको अस्पतालले जनाएको छ। जिवनजल पनि निःशुल्क वितरण हुने औषधिहरूमध्ये अत्यावश्यक सूचीमा पर्दछ ।
जिवनजल नहुँदा अहिले झाडापखाला र जलवियोजनका बिरामीहरू निजी मेडिकल वा क्लिनिकबाट महँगो मूल्य तिरेर किन्न बाध्य भएका छन्। बिरामीहरूको सहजताका लागि चाँडोभन्दा चाँडो जिवनजल आपूर्ति गरिनुपर्ने सरोकारवालाहरूको माग छ ।