दोलखा, कार्तिक १८ । दोलखाको रोल्वालिङ हिमशृंखलामा पर्ने यलुङ री हिमालमा गएको भीषण हिमपहिरोमा परी विश्वकीर्तिमानधारी युवा आरोही फुर्वा तेन्जिङ शेर्पासहित सातजना बेपत्ता भएका छन् । उक्त दुर्घटनामा हालसम्म तीन जनाको मृत्यु भएको छ भने चार जनाको सकुशल उद्धार गरिएको प्रहरीले जनाएको छ । गौरीशंकर गाउँपालिका–९ बेदिङका २४ वर्षीय फुर्वा तेन्जिङ शेर्पाले हालसम्म १५ पटक सगरमाथाको सफल आरोहण गरेका थिए । उनी २४ वर्षको उमेरमै नौ पटक सगरमाथा आरोहण गरी गिनिज बुक अफ वर्ल्ड रेकर्डमा नाम लेखाएका युवा आरोही हुन् । जिल्ला प्रहरी कार्यालय दोलखाका प्रमुख प्रहरी नायब उपरीक्षक (डिएसपी) ज्ञानकुमार महतोका अनुसार, ड्रिम्स डेस्टिनेसन ट्रेक्स एन्ड एक्सपिडिसन कम्पनीको टोलीमा रहेका १४ जना आरोहीमध्ये सातजना हिमपहिरोमा परेपछि सम्पर्कविहीन भएका हुन् । सो टोलीमा तीन विदेशी, पाँच नेपाली गाइड र केही स्थानीय सहयोगी सहभागी थिए ।
सोमबार बिहान गएको भीषण हिमपहिरोले आरोहीहरूको बेसक्याम्प नै क्षतिग्रस्त बनाएको थियो । खराब मौसमका कारण सोमबार उद्धार कार्य प्रभावित भए पनि मंगलबार बिहान मौसम सुधार भएपछि हेलिकोप्टरमार्फत चारजनाको उद्धार गरिएको हो । उद्धार गरिएका मध्ये दुई नेपाली र दुई विदेशी रहेका छन् । जिल्ला प्रशासन कार्यालय दोलखाका अनुसार, नेपाली सेना, सशस्त्र प्रहरी र नेपाल प्रहरीको संयुक्त उद्धार टोली अहिले पनि घटनास्थलमा खटिएको छ । लामाबगरको गोंगरबाट खटिएको करिब ५० जनाको टोली ना गाउँतर्फ अघि बढिरहेको जनाइएको छ । डिएसपी महतोका अनुसार, “हालसम्म तीन जनाको शव फेला परेको छ भने सातजनाको खोजी कार्य जारी छ । खराब मौसमका कारण उद्धारमा कठिनाइ भए पनि प्रयास जारी छ ।” प्रहरीका अनुसार, आरोहणको अनुमति लिए पनि स्थानीय प्रशासनमा आरोहण विवरण दर्ता नगरिएको कारण प्रारम्भिक अवस्थामै आरोहीहरूको पहिचानमा समस्या आएको छ ।