काठमाडौं, १९ कात्तिक । नेकपा (एकीकृत समाजवादी) की संस्थापक नेतृ रामकुमारी झाँक्रीले पार्टीसँगको आफ्नो यात्रा टुंगिएको घोषणा गरेकी छिन् । बुधबार काठमाडौंमा आयोजित पत्रकार सम्मेलनमा बोल्दै झाँक्रीले पार्टी विघटनको दिशामा गएको बताउँदै आफू र आफ्ना सहकर्मीहरूको राजनीतिक यात्रा त्यहीँ समाप्त भएको स्पष्ट पारिन् । “नेकपा एकीकृत समाजवादी निर्माणका प्रारम्भिक दिनमा हामीले एउटा भयंकर अभियान चल्ने विश्वासका साथ काम थालेका थियौं । तर त्यो सम्भावना अब समाप्त भएको छ। हाम्रो समाजवादी पार्टीसँगको यात्रा, त्यो पार्टी विघटनसँगै टुंगियो ।”
उनका अनुसार, समाजवादी आन्दोलनले अपेक्षित दिशा लिन नसकेपछि अब नयाँ बाटो खोज्नुपर्ने आवश्यकता देखिएको छ । उनले उदाहरण दिँदै भनिन्, “जब बाटो अवरुद्ध हुन्छ, यात्रालाई पज गर्नुपर्छ। त्यसपछि उपयुक्त मार्ग प्रशस्त गरेर मात्रै यात्रा अगाडि बढाउनुपर्छ ।” यसअघि सोही कार्यक्रममा बोल्दै एकीकृत समाजवादीका अर्का नेता किसान श्रेष्ठले आफूहरू निःशर्त एमालेमा फर्किन लागेको जानकारी गराएका थिए । उनले भने, “हामीलाई केही चाहिएको छैन, मूल घरले हाँसेर बोलिदिए, सम्मानजनक व्यवहार गरे पुग्छ ।” एकीकृत समाजवादीका अध्यक्ष माधवकुमार नेपालले हालै नेकपा (माओवादी केन्द्र) सँग पार्टी एकता गर्ने निर्णय गरेपछि झाँक्री र श्रेष्ठले उक्त कदमप्रति असहमति जनाउँदै पार्टी विघटनको घोषणा गरेका हुन् । झाँक्रीको यो घोषणा सँगै नेकपा (एकीकृत समाजवादी) भित्रको असन्तोष खुलेर बाहिर आएको छ र आगामी दिनमा ती नेताहरूको नयाँ राजनीतिक यात्राप्रति सबैको चासो बढेको छ ।