भोजपुर । नेपाली साहस र गौरवको प्रतीक मानिने ‘भोजपुरे खुकुरी’ अझै पनि भोजपुरका स्थानीय कालीगढहरूको हातमै चम्किरहेको छ । परम्परागत सीप र आधुनिक प्रविधिको मिश्रणमा तयार हुने यी खुकुरी देशभित्र मात्र होइन, विदेशसम्म पनि लोकप्रिय बनेका छन् । भोजपुरका खुकुरी व्यवसायी हीरा श्रेष्ठका अनुसार अहिले बजारमा उपलब्ध भोजपुरे खुकुरीको मूल्य रु ५०० देखि रु ५२,००० सम्म पर्छ । “यहाँका खुकुरीहरू साधारणदेखि विशेष डिजाइनका मागका आधारमा बनाइन्छन्,” उनले भने, “उच्च मूल्यका खुकुरी बनाउनका लागि उत्कृष्ट गुणस्तरका फलाम, काँसा र काठ प्रयोग गरिन्छ ।”
उनका अनुसार भोजपुरे खुकुरीको माग नेपालका विभिन्न ठाउँहरूसँगै अमेरिका, बेलायतलगायत देशहरूमा पनि बढ्दो क्रममा छ । तर कहिलेकाहीँ ठूलो परिमाणमा माग आउँदा उत्पादन क्षमताले माग पूरा गर्न कठिनाइ हुने गरेको उनले बताए । पहिले पूर्ण रूपमा हातको सहायताले बनाइने खुकुरी अहिले आधुनिक उपकरणको सहयोगमा अझ आकर्षक र बलियो बनाइन्छ । फलाम तताउने, धारिलो पार्ने, बिँड र दाप बनाउने काम अझै पनि स्थानीय कालीगढहरूले आफ्नै सीपले गर्छन् । भोजपुरे खुकुरी अहिले पनि नेपाली पहिचान र वीरताको प्रतीकका रूपमा परिचित छ। भोजपुर घुम्न आउने आन्तरिक तथा बाह्य पर्यटकहरू प्रायः खुकुरीलाई ८८‘स्मृति उपहार’८८का रूपमा लिएर जाने गरेका छन् । यसले स्थानीय पर्यटन र अर्थतन्त्रमा उल्लेखनीय योगदान पुर्‍याइरहेको स्थानीयहरूको भनाइ छ ।