काठमाडौँ, २५ कात्तिक २०८२ — अखिल नेपाल किसान महासंघ (क्रान्तिकारी) ले यस वर्ष पनि सरकारले किसानको उत्पादन खरिद नगरेको भन्दै कडा आपत्ति जनाएको छ । महासंघका संयोजक गुणराज लोहनीले मंगलबार जारी गरेको विज्ञप्तिमा किसानले उत्पादन गरेको धान राज्यले किन नलिएको र सरकारी कम्पनीहरूले खरिद प्रक्रिया ढिलो गरेको कारण किसानहरू दिनरात पालो कुर्दै धान बेच्न पर्खिरहेका छन् भनेर उल्लेख गरिएको छ । महासंघले सरकारको तर्फबाट कृषि सिँचाइ, मल र उन्नत जातको बीउको आपूर्ति नगरी किसानहरूलाई उत्पादनमा सहयोग नगरेको आरोप लगाएको छ । विज्ञप्तिमा भनिएको छ, “धान नपुग्ने कृषि विशेष क्षेत्रमा किसानले ऋण लिएर महिनौं मेहनत गरी उत्पादन गरेको धान नकिन्नु अपराध हो ।”
संगठनका अनुसार सरकारी खाद्य व्यवस्था तथा व्यापार कम्पनी लिमिटेडले खरिद मूल्य तोके पनि व्यवहारमा किसानले उचित मूल्य नपाएको गुनासो छ । उल्टो, दलाल र व्यापारीहरूले किसानको धान सस्तो मूल्यमा खरिद गरी नाफा कमाइरहेका छन् । महासंघले भन्यो, “सरकारले तोकेको मात्रामा भन्दा बढी नकिन्ने र ढिलासुस्ती गर्ने कुरा मार्जिनको बहानाका लागि गरिँदैछ । यदि सरकारले तत्काल धान खरिद नगरी किसानलाई राहत दिएन भने हामी किसानहरूलाई लिएर सशक्त आन्दोलन गर्न बाध्य हुनेछौं ।” संयोजक लोहनीले सरकारलाई चेतावनी दिँदै भनेका छन्, “यदि हाम्रो माग तत्काल सम्बोधन भएन भने धान बेच्न नपाएर मारमा परेका किसानसँगै संगठनले कडा आन्दोलनको तयारी गर्नेछ ।”