काठमाडौँ । चालु आर्थिक वर्ष २०८२/८३ को पहिलो चार महिनामा नेपालले गरेको वैदेशिक व्यापार ७ खर्ब रुपैयाँ नाघेको छ । भन्सार विभागले आइतबार सार्वजनिक गरेको विवरण अनुसार साउनदेखि कार्तिकसम्मको अवधिमा देशको कुल वैदेशिक व्यापार २४.१८ प्रतिशतले वृद्धि भई ७ खर्ब २ अर्ब ९४ करोड ७० लाख रुपैयाँ पुगेको हो । गत वर्ष यही अवधिमा ५ खर्ब ६६ अर्ब रुपैयाँ बराबरको व्यापार भएको थियो । उक्त चार महिनामा नेपालबाट हुने वस्तु निर्यात ७७.५१ प्रतिशतले वृद्धि भएको विभागले जनाएको छ । गत आर्थिक वर्ष २०८१/८२ को सोही अवधिमा ५२ अर्ब ६७ करोड रुपैयाँको निर्यात भएकोमा यस वर्ष बढेर ९३ अर्ब ४९ करोड ५७ लाख रुपैयाँ पुगेको छ । निर्यातमा देखिएको यो उल्लेख्य वृद्धि अर्थतन्त्रका लागि सकारात्मक मानिएको छ ।
निर्यातसँगै आयात पनि वृद्धि भएको छ । चार महिनामा ६ खर्ब ९ अर्ब ४५ करोड १२ लाख रुपैयाँ बराबरको वस्तु आयात भएको छ, जुन गत वर्षको तुलनामा १८.७१ प्रतिशत बढी हो । गत वर्ष यही अवधिमा ५ खर्ब १३ अर्ब ३८ करोड रुपैयाँको आयात भएको थियो । निर्यात बढेपनि आयातको उच्च परिमाणका कारण मुलुकको व्यापार घाटा अझै ठूलो छ । चालु आर्थिक वर्षको चार महिनामा व्यापार घाटा ५ खर्ब १५ अर्ब ९५ करोड ५४ लाख रुपैयाँ पुगेको छ । यो आँकडा गत वर्षको सोही अवधिभन्दा ११.९९ प्रतिशतले बढी हो । संक्षेपमा कुल वैदेशिक व्यापार : रु. ७ खर्ब २ अर्ब ९४ करोड, कुल आयातः रु. ६ खर्ब ९ अर्ब ४५ करोड (१८.७१% वृद्धि), कुल निर्यातः रु. ९३ अर्ब ४९ करोड (७७.५१% वृद्धि) र व्यापार घाटा : रु. ५ खर्ब १५ अर्ब ९५ करोड (११.९९% वृद्धि) रहेको छ ।