दाङ — नेकपा (बहुमत) ५ नं. ब्युरोले देशको बदलिँदो राजनीतिक परिस्थिति, जनसंविधान निर्माण तथा स्वाधीन संयुक्त सरकारको आवश्यकता विषयक अन्तरक्रिया कार्यक्रम मंगलबार घोराहीमा सम्पन्न गरेको छ । कार्यक्रममा पार्टीका महासचिव धर्मेन्द्र बास्तोला ‘कञ्चन’ मुख्य वक्ताका रूपमा सहभागी भएका थिए । अन्तरक्रियामा महासचिव कञ्चनले पछिल्ला वर्षहरूमा देश राजनीतिक अस्थिरता, आर्थिक दबाब र नेतृत्वहीनताबाट ग्रस्त बन्दै गएको टिप्पणी गरे । उनले दलाल पूँजीवादी संरचनाले मुलुकलाई निरन्तर संकटतर्फ धकेल्दै आएको र जनआन्दोलनका मुद्दा क्रमशः ओझेलमा परेपछि जनतामा निराशा बढेको बताए ।
उनका अनुसार भ्रष्टाचार, असमानता र प्रशासनिक कमजोरीका कारण शासनप्रति जनविश्वास घटिरहेको छ र वैकल्पिक राजनीतिक मार्गप्रति आकर्षण बढ्दो छ । यही असन्तुष्टिले जेन्जी विद्रोहजस्ता घटनाहरू जन्माएको उनको भनाइ थियो । कञ्चनले परम्परागत राजनीतिक शक्ति—पूर्वराजतन्त्रदेखि हालसम्मका दलहरू—देश चलाउन असफल देखिएको भन्दै जनसंविधानमार्फत जनताको प्रत्यक्ष शासन व्यवस्था अबको आवश्यकता भएको धारणा प्रकट गरे ।
कार्यक्रममा जनमोर्चाका जिल्ला अध्यक्ष गणेश आचार्य, नेपाली कम्युनिस्ट पार्टीका संयोजक बरूण, क्रान्तिकारी कम्युनिस्ट पार्टी नेपालका पोलिटब्युरो सदस्य समीर, नेपाल पत्रकार महासंघका केन्द्रीय सचिव सबिन प्रियासन तथा जनमुक्ति सेना बुद्धिजीवी–प्रतिरोध अभियानका प्रमोद धिताललगायतका सहभागीहरूले पनि आफ्ना विचार राखेका थिए । अन्तरक्रिया कार्यक्रमकोे अध्यक्षता ५ नं. ब्युरो इन्चार्ज जितले गरे भने सहजीकरण ब्युरो कार्यालय सचिव सजकले गरेका थिए ।