काठमाडौँ । अख्तियार दुरुपयोग अनुसन्धान आयोगले त्रिभुवन विश्वविद्यालय (त्रिवि) क्षेत्रीय परीक्षा नियन्त्रण कार्यालय, पूर्वाञ्चल विराटनगरका सह–परीक्षा नियन्त्रक डिल्लीराम प्रसाईंसहित चार जनाविरुद्ध भ्रष्टाचार मुद्दा दायर गरेको छ । अख्तियारले विशेष अदालतमा प्रसाईंसहित सह–परीक्षा नियन्त्रक छनोट समितिका संयोजक प्रा. डा. जयालक्ष्मी प्रधान, सदस्य प्रा. डा. मोतिलाल शर्मा र प्रा. डा. मेघराज पोखरेलविरुद्ध मुद्दा दायर गरेको हो । अख्तियारका अनुसार प्रसाईंले आफूसँग नभएको विद्यावारिधि (पिएचडी) प्राप्त गरेको भनी फर्जी विवरण पेस गरी लाभ लिएको आरोपमा अनुसन्धान हुँदै आएको थियो । त्रिवि रजिष्ट्रार कार्यालय, कीर्तिपुरले सह–परीक्षा नियन्त्रक छनोट प्रक्रियामा उनले प्रस्तुत गरेको शैक्षिक योग्यता फर्जी रहेको पुष्टि भएपछि अख्तियारमा उजुरी परेको थियो । गत वर्ष भदौमा त्रिविले विराटनगरमा सह–परीक्षा नियन्त्रकका लागि आवेदन खुला गरेपछि ६ जनाले दरखास्त दिएका थिए । पद्मकन्या क्याम्पसकी प्रा. डा. जयालक्ष्मी प्रधान, त्रिवि रसायनशास्त्र विभागका प्रा. डा. मोतिलाल शर्मा तथा प्रा. डा. मेघराज पोखरेल रहेको तीन सदस्यीय छनोट समितिले पोखरेललाई सिफारिस गरेको थियो । सोही सिफारिसलाई गैरकानुनी भन्दै अख्तियारमा उजुरी परेको थियो ।
अनुसन्धानका क्रममा प्रसाईंले विद्यावारिधिको प्रमाणपत्र नै नपाई पिएचडी गरेको भनी दावा गरेको, आफ्नो नेमप्लेट तथा क्यालेन्डरमा ‘डा.’ उपाधि प्रयोग गरेको, र सोही फर्जी उपाधि प्रयोग गरी अधिकृत पद र सुविधा पाउने उद्देश्य राखेको आरोपपत्रमा उल्लेख छ । साथै, छनोट समितिका तीन प्राध्यापकले प्रसाईंसँग मिलेमतो गरी परीक्षाको परिणाम फेरबदल गरेको, झुटा विवरणका आधारमा सह–परीक्षा नियन्त्रक पदका लागि गलत प्रतिवेदनसहित सिफारिस गरेको प्रमाणित भएको अख्तियारले जनाएको छ । अख्तियारले चारैजनालाई भ्रष्टाचार निवारण ऐन, २०५९ बमोजिम कारबाही गर्न विशेष अदालतमा आरोपपत्र दायर गरेको जनाएको छ ।