ललितपुर । नेपाली कांग्रेसले आफ्नो आगामी केन्द्रीय महाधिवेशन पुस २६ देखि २८ गतेसम्म काठमाडौँमा गर्ने निर्णय गरेको छ । कांग्रेस केन्द्रीय कार्यालय सानेपामा बसेको केन्द्रीय समितिको आजको बैठकले महाधिवेशनको मिति तय गरेको पार्टीका प्रवक्ता डा. प्रकाशशरण महतले जानकारी दिनुभयो । गत असोज २८ गतेदेखि जारी केन्द्रीय समितिको बैठक आज सम्पन्न भएको हो । निर्णय सार्वजनिक गर्दै प्रवक्ता महतले महाधिवेशन तयारीका लागि मङ्सिर २० गतेभित्र क्रियाशील सदस्य वितरण गर्नेगरी कार्यतालिका स्वीकृत गरिएको बताउनुभयो ।उनका अनुसार मङ्सिर २४ गतेसम्म क्रियाशील सदस्यता नवीकरण टुंग्याइने र पुस ८ गतेसम्म नयाँ क्रियाशील सदस्य सम्बन्धी सबै प्रक्रिया पूरा गरिने भएको छ । नयाँ क्रियाशील सदस्य वितरणमा समावेशीकरण, युवा तथा हालै पार्टी प्रवेश गरेका व्यक्तिलाई प्राथमिकता दिने निर्णय भएको उहाँले जानकारी दिनुभयो ।
पार्टीले विभिन्न संरचनाका अधिवेशनको तालिका सार्वजनिक गरेको छ । जस्मा : पुस १५ गतेभित्र जनसम्पर्क समितिको अधिवेशन, पुस १६ गते गाउँ तथा नगर वडा अधिवेशन, पुस १७ गते गाउँ तथा नगरपालिका अधिवेशन, पुस १९ गते प्रदेश क्षेत्रीय अधिवेशन, पुस २१ गते प्रतिनिधिसभा क्षेत्रीय अधिवेशन तथा एक मात्र निर्वाचन क्षेत्र भएका जिल्लाको अधिवेशन, पुस २२ गते एकभन्दा बढी निर्वाचन क्षेत्र भएका जिल्लाको अधिवेशन र पुस २३–२४ गते सातै प्रदेशका अधिवेशन ।