काठमाडौं, मंसिर १७ । नेकपा (बहुमत) निकट अखिल (क्रान्तिकारी) पाटन संयुक्त क्याम्पस समितिले BSC CSIT कार्यक्रममा बढाइएको शुल्क स्थगित गर्न माग गर्दै क्याम्पस प्रशासनलाई मागपत्र बुझाएको छ । समितिले शुल्कवृद्धि विद्यार्थी विरूद्धको निर्णय भएको आरोप लगाउँदै तत्काल फिर्ता नभए आन्दोलनमा जाने चेतावनी दिएको छ । मागपत्रमा शैक्षिक संस्थाहरू व्यापारिकरण र भ्रष्टाचारतर्फ उन्मुख भएको आरोप लगाइएको छ । “शिक्षा जस्तो संवेदनशील क्षेत्रमा ठूलो व्यापार भैरहेको छ । त्रिभुवन विश्वविद्यालय अन्तर्गतका संस्थाहरू र नियामक निकायहरू भ्रष्टाचारको चंगुलमा छन्,” मागपत्रमा उल्लेख छ ।
क्याम्पसले पूर्वाधार तथा गुणस्तर विकासको नाममा अत्यधिक शुल्क वृद्धि गरी विद्यार्थीलाई आर्थिक रूपमा मारमा पारिएको क्रान्तिकारीको आरोप छ । उनीहरूले शुल्क वृद्धिले निम्न आर्थिक पृष्ठभूमिका विद्यार्थीहरूलाई उच्च शिक्षाबाट वञ्चित गराउने उद्देश्य प्रष्ट देखिने दाबी गरेका छन् । समितिले पुरानै शुल्क कायम गरी विद्यार्थीलाई सहज अध्ययन वातावरण सुनिश्चित गर्न क्याम्पस प्रशासनसँग आग्रह गरेको छ । “हाम्रो माग वेवास्ता भए संगठन संघर्षमा जान बाध्य हुनेछ र त्यसबाट उत्पन्न परिणामको जिम्मेवारी सम्बन्धित निकायमै पर्नेछ,” मागपत्रमा चेतावनी दिइएको छ ।