काठमाडौं । नेपाल कम्युनिस्ट पार्टी (बहुमत) १ नम्बर ब्यूरोको तेस्रो पूर्ण बैठक हालै सम्पन्न भएको छ । ब्यूरो इन्चार्ज ‘धमिल’ को अध्यक्षता र केन्द्रीय सचिवालय सदस्य ‘गम्भीर’ को प्रमुख आतिथ्यतामा सम्पन्न बैठकले मुलुकमा देखिएका राजनीतिक, आर्थिक र सामाजिक चुनौतीहरूको समीक्षा गर्दै नयाँ राजनीतिक हस्तक्षेप आवश्यक रहेको निष्कर्ष निकालिएको छ । बैठकका प्रमुख अतिथि गम्भीरले प्रशिक्षणमूलक राजनीतिक मन्तव्य प्रस्तुत गर्दै जेन–जी आन्दोलनको ऐतिहासिक पृष्ठभूमिबारे चर्चा गरे । उनले मुलुकको स्वाधीनता र सार्वभौमसत्तामाथि चुनौतिहरू बढ्दै गएको दाबी गर्दै क्रान्तिकारी शक्तिहरू निर्णायक रूपमा अगाडि बढ्नुपर्ने आवश्यकता औंल्याए । गम्भीरले स्वाधीन संयुक्त सरकार गठन, जनसंविधान निर्माण र देशव्यापी जनसंघर्ष–जनसंवाद अभियानलाई पार्टीको मुख्य राजनीतिक दायित्वका रूपमा अघि सार्ने बताए ।
पूर्ण बैठकले बढ्दो भ्रष्टाचारलाई “जनताको भविष्यमाथिको गम्भीर प्रहार” को रूपमा व्याख्या गर्दै संगठनात्मक शक्ति र वर्गीय जागरूकताका माध्यमबाट भ्रष्टाचारविरुद्ध आन्दोलनलाई तीव्र बनाउने निर्णय गरेको छ । प्रदेश १ मा योजनाबद्ध राजनीतिक अभ्यासमार्फत् क्रान्तिकारी आन्दोलनलाई नयाँ उचाइमा पुर्‍याउने लक्ष्यसहित बैठकले ‘जनसंविधानका लागि जनसंघर्ष अभियान’ तत्काल सञ्चालन गर्ने निर्णय पनि गरेको छ । यस अभियानमार्फत् जनसंवाद, जनदबाब र जनएकता विस्तार गर्दै राष्ट्रिय बहसको केन्द्रमा जनसंविधान निर्माणलाई स्थापित गर्ने उल्लेख गरिएको छ । पार्टीका अनुसार आगामी अभियानले प्रतिक्रियावादी सत्ताबाट संवैधानिक तथा राजनीतिक प्रक्रियामा देखिएको संकटलाई चुनौती दिने रणनीति अपनाउने छ । भ्रष्टाचारविरुद्ध जनकारबाहीलाई प्राथमिक राजनीतिक मोर्चाको रूपमा अघि बढाइने निर्णय बैठकमा गरिएको जनाइएको छ । बैठकमा केन्द्रीय सचिवालय सदस्य ‘सागर’ र केन्द्रीय सल्लाहकार समिति सदस्य ‘उमेश’ ले पनि विशेष आतिथ्य ग्रहण गरेका थिए ।