कैलाली धनगढी । नेपाल कम्युनिस्ट पार्टी (बहुमत) ७ नम्बर ब्युरोद्वारा आयोजित राजनीतिक तथा वैचारिक प्रशिक्षण कार्यक्रम सम्पन्न भएको छ । प्रशिक्षण कार्यक्रममा पार्टीका महासचिव कञ्चन प्रमुख अतिथिका रूपमा उपस्थित भएका थिए । ७ नम्बर ब्युरो इन्चार्ज डिडि पाण्डेको अध्यक्षतामा सम्पन्न कार्यक्रममा गणेश रैकाल ‘रोशन’ ले सञ्चालन गरेका थिए भने स्वागत मन्तव्य राम भट्टले प्रस्तुत गरेका थिए ।

प्रशिक्षणलाई सम्बोधन गर्दै प्रमुख अतिथि कञ्चनले देशको राजनीतिक अवस्था जटिल मोडमा पुगेको भन्दै पार्टीले ‘जनसंविधान’ का लागि जनसंघर्ष अभियान सञ्चालन गर्न बाध्य भएको बताए। उनले देश राजनीतिक रूपमा अस्थिर बन्दा स्वाधीन संयुक्त सरकार गठन नै वर्तमान परिस्थितिको एक मात्र विकल्प रहेको उल्लेख गरे । कार्यक्रममा सहभागीहरूले पार्टीको वैचारिक दिशानिर्देश, वर्तमान राजनीतिक अवस्थाको मूल्यांकन तथा आगामी संघर्षका कार्यक्रमबारे विस्तृत प्रशिक्षण प्राप्त गरेका थिए ।