बुटवल, रुपन्देही । नेपाल कम्युनिष्ट पार्टी (बहुमत) निकट कम्युनिष्ट युवा संगठन नेपालको भेला आयोजक समितिको बैठक बुटवलमा सम्पन्न भएको छ । संगठनका केन्द्रीय संयोजक झलक वि.क.को अध्यक्षता र पार्टीका महासचिव धर्मेन्द्र वास्तोला ‘कञ्चन’को प्रमुख आतिथ्यमा सम्पन्न उक्त बैठकले संगठनको आगामी दिशानिर्देश, कार्यक्रम र अभियानबारे महत्वपूर्ण निर्णयहरू गरेको छ । बैठकमा सहभागी एक नेताका अनुसार, बैठकले आगामी फागुन महिनामा संगठनको भेला आयोजना गर्ने र देशभर बढ्दै गएको भ्रष्टाचारविरुद्ध निर्णायक र निर्मम संघर्ष आरम्भ गर्ने निर्णय गरेको छ ।
बैठकका प्रमुख अतिथि महासचिव वास्तोलाले देशको स्वाधीनता गम्भीर संकटमा परिरहेको दाबी गर्दै युवा देशभर सक्रिय भई राष्ट्रहितमा योगदान गर्नुपर्नेमा जोड दिए । उनले पार्टीले अघि बढाएको जनसंविधानका लागि जनसंघर्ष अभियानलाई सशक्त रूपमा संचालन गर्न सबै युवाहरूलाई लामबद्ध हुन निर्देशन दिएका थिए । कार्यक्रममा पार्टीका ५ नं. ब्युरो इन्चार्ज जीत, सचिवालय सदस्य तिलकलगायतका अन्ने पार्टीका  नेताहरूको उपस्थिति रहेको उक्त बैठकले संगठनको आन्तरिक जीवनको समीक्षा गर्ने साथै आगामी कार्यभार प्रभावकारी ढंगले अघि बढाउन अल्पकालीन र दीर्घकालीन योजना सहितका निर्णयहरू गर्दै सम्पन्न भएको जनाइएको छ ।