कञ्चनपुर । अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) सुदूरपश्चिम प्रदेशको बैठक नेकपा (बहुमत) का केन्द्रीय सदस्य तथा ७ नं. ब्युरो कार्यालय सचिव विज्ञानको प्रमुख आतिथ्यतामा सम्पन्न भएको छ । कार्यक्रममा सङ्गठनका केन्द्रीय सचिव तथा सुदूरपश्चिम प्रदेश संयोजक गोबिन्द बिष्ट विशेष अतिथि रहनुभएको थियो । बैठकलाई सम्बोधन गर्दै प्रमुख अतिथि विज्ञानले नेकपा (बहुमत)ले सुरु गरेको भ्रष्टाचार र वित्तीय शोषणविरुद्धको आन्दोलन र जनसंविधानका लागि जनसंघर्ष अभियानमा युवा पुस्ताले नेतृत्व ग्रहण गर्नुपर्ने आवश्यकता औंल्याउनुभयो । देशमा देखिएको नेतृत्व संकट र नयाँ विचारको बहसलाई मूर्त रूप दिन पार्टीले बैशाखमा गर्न लागेको राष्ट्रिय सम्मेलनका लागि विद्यार्थीहरूले अध्ययन–अनुसन्धानमा जुट्नुपर्नेमा उहाँले जोड दिनुभयो ।

त्यस्तै, विशेष अतिथि गोबिन्द बिष्टले सङ्गठनले अघि सारेको वैज्ञानिक समाजवादी शिक्षा प्राप्तिको कार्यभार पूरा गर्न संगठनका तत्कालीन निर्णयहरू दृढतापूर्वक कार्यान्वयन गर्न सबैलाई आह्वान गर्नुभयो । बैठकले विद्यार्थी हितका विभिन्न विषयमा संघर्ष गर्ने निर्णय गरेको छ । तीमध्ये : छात्रवृत्ति सम्बन्धी व्यवस्था प्रभावकारी रूपमा लागू गराउने, सरकारी विद्यालयहरूले अनुदान रकममा गरिरहेको दुरुपयोग रोक्न दबाब दिने, सार्वजनिक यातायातमा विद्यार्थीलाई छुट दिने व्यवस्था कार्यान्वयन गर्न संघर्ष गर्ने—जस्ता निर्णयहरू प्रमुख रहेका छन् ।

सँगै, बैठकले सुदूरपश्चिम प्रदेशअन्तर्गतका विभिन्न जिल्ला तथा क्याम्पसमा नेतृत्व हेरफेर समेत गरेको छ । जस्मा कञ्चनपुर जिल्ला तथा सुप विश्वविद्यालय इन्चार्ज – प्रकाश, कैलाली जिल्ला – निशान्त, कञ्चनपुर जिल्ला संयोजक – आदेश, बैतडी जिल्ला संयोजक – मोहित, अछाम जिल्ला संयोजक – डिबी, डोटी जिल्ला संयोजक – नविन, बझाङ जिल्ला संयोजक – जनक, बाजुरा जिल्ला संयोजक – सानिया, कैलाली बहुमुखी क्याम्पस संयोजक – दानबहादुर, बिरेन्द्र बहुमुखी क्याम्पस संयोजक – अंकित रहेका छन् ।
सङ्गठनका सुदूरपश्चिम प्रदेश संयोजक बिनोद जप्रेलको अध्यक्षतामा बसेको बैठकमा सचिवालय सदस्य तथा गण्डकी प्रदेश संयोजक राजन साउद, सचिवालय सदस्य तथा छात्रा विभाग प्रमुख लक्ष्मी शाहलगायतको उपस्थिति रहेको थियो । बैठकको प्रारम्भमा कार्तिक २९ गते सवारी दुर्घटनामा निधन भएका संगठनका केन्द्रीय सदस्य तथा डडेलधुरा जिल्ला संयोजक भैरव रावतप्रति श्रद्धाञ्जलि अर्पण गरिएको थियो ।