भारतको महाराष्ट्र, पुणे स्थित रेल्वे प्लेटफर्ममा एक ११ वर्षीय नेपाली बालक मृत फेला परेका छन् । मृत्यु भएको अवस्थामा भेटिएका ती बालक अछाम जिल्ला, ढकारी गाउँपालिका–२ का डबले सार्कीका छोरा प्रकाश सार्की भएको पुष्टि भएको छ । बालक १० डिसेम्बर २०२५ को साँझ करिब ६ बजेदेखि बेपत्ता भएका थिए । ११ डिसेम्बर २०२५ को बिहान रेल्वे स्टेशन नजिकै उनको शव फेला परेको भारतीय प्रहरी स्रोतले जनाएको छ । प्रारम्भिक विवरण अनुसार बालकको किड्नी निकालिएको अवस्थामा शव भेटिएको हो, जसले यो घटनालाई थप संवेदनशील र रहस्यमयी बनाएको छ । यो दुःखद घटनाप्रति प्रगतिशील नेपाली जनसमाज समितिले गहिरो श्रद्धाञ्जली अर्पण गरेको छ । समितिले सोकाकुल परिवारप्रति हार्दिक समवेदना व्यक्त गर्दै यस निर्मम अपराधको सत्यतथ्य छानबिन गर्न भारतीय सरकारसँग माग गरेको छ । साथै, यस प्रकारका अमानवीय घटनाहरू रोकिन र दोषीहरूलाई कडा कारबाही होस् भन्ने माग समितिको छ ।
समितिले नेपाल सरकार तथा कूटनीतिक निकायमार्फत सन् १९५० को असमान सन्धि पुनरावलोकन गर्नुपर्ने आवश्यकता रहेको पनि औंल्याएको छ । विदेशमा रहेका नेपालीहरूको सुरक्षा, मर्यादा र रोजगारी सुनिश्चित गर्न दुवै देशबीच प्रभावकारी कदम चालिनुपर्नेमा समितिको जोड रहेको छ । समितिले सम्पूर्ण नेपाली समुदायलाई यस्तो घटनाप्रति सतर्क हुन आग्रह गरेको छ ।