बर्दिया । नेपाल कम्युनिष्ट पार्टी (बहुमत) ६ नं. ब्युरो अन्तर्गत वर्दिया जिल्लाले जनसंविधानका लागि जनसंघर्ष अभियान सुरु गरेको छ । जिल्लाको बढैयातालमा आयोजित उद्घाटन कार्यक्रममा पार्टी केन्द्रीय समिति सदस्य बर्दिया जिल्ला इन्चार्ज परिवर्तनले उक्त अभियानको औपचारिक घोषणा गरेका हुन् । कार्यक्रमलाई सम्बोधन गर्दै उनले जनताको अधिकार, जनतासँगको सम्बन्ध विस्तार तथा भ्रष्टाचार विरोधी कठोर संघर्ष नै अभियानको मुख्य लक्ष्य रहेको बताए ।
उनका अनुसार, “यो व्यवस्था दलालहरूद्वारा सञ्चालन हुँदै आएको हुँदा अहिले हुने निर्वाचनको पूर्णरूपमा बहिष्कार गर्नुपर्ने“ आवश्यकता पार्टीले महसुस गरेको छ । जिल्ला इन्चार्ज परिवर्तनले विद्यमान संविधान जनताको हितमा निर्माण हुन नसकेको भन्दै यसलाई “दलाल र माफियाहरूको संविधान” को रूपमा व्याख्या गरे। उनले भने, “यस संविधानले नेपाली जनताको रक्षा गर्न सकेन, त्यसैले अब जनसंविधानका लागि सबै तयार हुनुपर्छ ।” देशको वर्तमान राजनीतिक संकट समाधान गर्न स्वाधीन सरकार निर्माण नै विकल्प भएको उनको भनाइ थियो । जिल्ला सेक्रेटरी दिलमान, केशर लगाएतले सम्बोधन गरेको कार्यक्रममा जनताको उल्लेख्य सहभागिता भएको थियो ।