काठमाडौं । नेकपा (एमाले) अध्यक्ष केपी शर्मा ओलीले पार्टीभित्र फरक प्यानल बनाएर प्रतिस्पर्धा गरेका नेताहरूमाथि निषेधको राजनीति अपनाएको आरोप लागेको छ । पूर्वराष्ट्रपति विद्या भण्डारीको समर्थनमा अलग प्यानल बनाएर चुनावी प्रतिस्पर्धामा उत्रिएका ईश्वर पोखरेल र सुरेन्द्र पाण्डेलाई ओलीले महाधिवेशनपछि समेत उपेक्षा गरेका छन् । अध्यक्षका उम्मेदवार ईश्वर पोखरेल र महासचिवका उम्मेदवार सुरेन्द्र पाण्डेलाई मात्र होइन, उनीहरू पक्षका कुनै पनि पदाधिकारी उम्मेदवारलाई ओलीले खुलातर्फको केन्द्रीय सदस्यको सूचीमा समेत समावेश गरेनन् । दुईतिहाइभन्दा बढी मत रहेको ओली पक्षले निषेधको नीति अपनाउँदा त्यसको प्रत्यक्ष असर देखिएको नेताहरूको भनाइ छ । यही कारण सुरेन्द्र पाण्डे केन्द्रीय सदस्यको निर्वाचनमा पराजित भएको बताइन्छ । यसको विपरीत, ईश्वर–सुरेन्द्र पक्षले केपी ओली, शंकर पोखरेलसहित ओली प्यानलका अधिकांश पदाधिकारी उम्मेदवारलाई केन्द्रीय सदस्यको सूचीमा राखेको थियो । ईश्वर प्यानलबाट पराजित एक पदाधिकारी उम्मेदवारले भने, “हामीले सहकार्यको हात बढायौँ तर उहाँले निषेधको नीति लिनुभयो । यसरी पार्टी चलाइयो भने सबैको योग्यता, क्षमता र योगदान उपयोग हुन सक्दैन ।”
निर्वाचनपछि सामाजिक सञ्जालमार्फत अध्यक्ष ओलीलाई बधाई दिएका पोखरेल र पाण्डेलाई समेत शपथ ग्रहण समारोहमा बोलाइएको थिएन । बन्दसत्रको अध्यक्षमण्डलका अध्यक्षको हैसियतमा रहेका ओलीले उनीहरूलाई शपथ कार्यक्रममा सहभागी गराउन आवश्यक ठानेनन् । निर्वाचन आयोगले पनि मुख्य प्रतिस्पर्धी नेताहरूलाई शपथ समारोहमा समेट्न पहल नगरेको बताइन्छ । शपथ समारोहमा बोलावटको आशामा रहेका पोखरेल र पाण्डे दुवैले कार्यक्रममा सहभागिता जनाएनन् । यस घटनाले एमालेभित्र आन्तरिक एकतामाथि गम्भीर प्रश्न उठाएको छ ।