काठमाडौँ — बंगलादेशमा लोकप्रिय विद्यार्थी नेता तथा इन्कलाव मञ्चका प्रवक्ता सरिफ ओस्मान हादीको निधनपछि देशभर प्रदर्शन उग्र बनेको छ । परिस्थिति नियन्त्रणबाहिर जान थालेपछि शुक्रबार राजधानी ढाकासहित विभिन्न क्षेत्रमा प्रहरी र अर्धसैन्य दस्तालाई परिचालन गरिएको छ । बिहीबार रातिदेखि देशका विभिन्न भागमा आगजनी, तोडफोड र हिंसाका घटना भएका छन्। प्रदर्शनकारीहरूले दुई प्रमुख सञ्चारमाध्यम प्रोथोम आलो र डेली स्टार का कार्यालयमाथि समेत आक्रमण गरेका छन्। यस घटनाले बंगलादेशको सुरक्षा अवस्था थप संवेदनशील बनेको छ । आगामी फेब्रुअरी १२ मा आम निर्वाचन हुने तय भइसकेको अवस्थामा भएको यस किसिमको आन्दोलनले सरकार र निर्वाचन आयोगलाई गम्भीर चिन्तामा पारेको छ। चुनावको पूर्वसन्ध्यामा उत्पन्न अस्थिरताले राजनीतिक वातावरण थप तनावग्रस्त बनेको छ ।
छ दिनसम्म उपचारपछि सरिफ ओस्मान हादीको बिहीबार निधन भएको हो । बंगलादेशमा उपचार सम्भव नभएपछि उनलाई थप उपचारका लागि सिंगापुर लगिएको थियो । गत साता शुक्रबार ढाकामा नकाबधारी समूहले उनलाई टाउकोमा गोली हानेको थियो । गत वर्ष शेख हसिनाको सरकारविरुद्ध भएको आन्दोलनमा हादी अग्रपंक्तिमा रहेर नेतृत्व गरिरहेका थिए । उनले बंगलादेशको राजनीतिमा भारतीय हस्तक्षेपको खुलेर विरोध गर्दै आएका थिए, जसका कारण उनी युवामाझ निकै लोकप्रिय थिए । बढ्दो हिंसापछि बंगलादेशका प्रधानमन्त्री मोहम्मद युनुसले टेलिभिजन सम्बोधनमार्फत जनतालाई शान्त रहन आग्रह गरेका छन् । उनले हादीको निधनले देशको राजनीतिक विकासमा गहिरो प्रभाव पारेको बताउँदै दोषीलाई छानबिन गरी कानुनी दायरामा ल्याइने प्रतिबद्धता व्यक्त गरेका छन् ।